Unha tese da USC abre camiño a modelos produtivos máis eficientes e sostíbeis con recursos renovábeis
Unha investigadora da Universidade de Santiago de Compostela (USC), Ana Arias Calvo, demostrou que o emprego de recursos biolóxicos como alternativa aos fósiles é facíbel, supón un menor impacto ambiental que os modelos produtivos convencionais e que favorece á circularidade.
Deste modo, a investigadora do Centro Interdisciplinar de Investigación en Tecnoloxías Ambientais (Cretus) propuxo nas súas teses o desenvolvemento de procesos biotecnolóxicos baseados no aproveitamento de recursos derivados das actividades de explotación madeireira e do sector agroalimentario.
Así, avaliou estratexias de produción biotecnolóxica para a valorización de recursos en produtos de alto valor engadido a través de metodoloxías de circularidade, sustentabilidade e análise de ciclo de vida para estudar as súas principais vantaxes e impactos.
Na investigación, proporcionou diversos casos de estudo nos cales analiza residuos procedentes da industria do papel, do sector agroalimentario e o sector forestal en termos de sustentabilidade e circularidade.
Entre outras probas, a súa avaliación contempla a análise do ciclo de vida dos produtos, o cumprimento dos principios da química verde ou sostíbel e exames de eco-eficiencia, así como de viabilidade económica.
Novos enfoques
Este compendio de metodoloxías permitiu medir a produtividade e a potencialidade dos procesos biolóxicos e estabelecer comparativas cos procesos tradicionais baseados en recursos fósiles e posibilitou identificar as principais vantaxes e os retos esenciais cara á súa inclusión no mercado e na cadea de valor.
A tese constata a posibilidade de usar integramente residuos procedentes de varios sectores produtivos para propor modelos de produción máis circulares e sostíbeis.
Así mesmo, a investigación proporciona novos enfoques de biorrefinaría que van máis alá do aproveitamento enerxético dos recursos para producir biocombustíbeis e mesmo para obter biocompost, os métodos do tratamento máis empregados na o xestión sostíbel dos residuos na actualidade.