As temperaturas modéranse mais seguen baixo cero no surleste do país

As temperaturas recuperáronse na madrugada desta quinta feira en boa parte do país, pero aínda se mantiveron baixo cero na noite e primeiras horas desta xornada na que se espera o regreso da neve por riba de 900 metros de altura e as choivas xeneralizadas tras varios días de dominio anticiclónico.

Con todo, en zonas por baixo dos 900 metros o mercurio descendeu até os -3,5 graos en Verín, -3ºC en Baltar e -2,2ºC tanto en Xinzo de Limia como en Viana do Bolo.

A temperatura máis baixa da noite rexistrouse na estación de Cabeza de Manzaneda, con 5,5 graos baixo cero. Tamén en zonas de montaña, o termómetro situouse en -5,3 graos na Veiga —estación de Xares— e -4,4ºC, —na estación de Corzos—, -4,7ºC en Lardeira e -3,5ºC en Pedrafita do Cebreiro.

Para esta quinta feira Meteogalicia avisa de nivel amarelo por vento do nordés no mar en toda a costa atlántica, entre as 15 e as 21 horas. Tras unha xornada inestábel, esta sexta feira será un día de transición cara á recuperación da influencia anticiclónica.

Así, para esta vindeira xornada agárdanse ceos con alternancia de nubes e claros, chuvascos máis probábeis no terzo norte e de neve con cotas superiores aos 800 metros.

As temperaturas non experimentarán cambios significativos e os ventos soprarán do nordeste, máis intensos pola tarde, cando serán moderados en toda a Galiza e aumentarán a sensación térmica de frío.