Son casos puntuais...

"A liberdade e a saúde seméllanse: o seu verdadeiro valor coñécese cando nos faltan". Henri Becque, dramaturgo francés (París, 1837-1899) O conselleiro de Sanidade, Julio García Comesaña, en declaracións aos medios de comunicación e de forma grandilocuente, afirmou que as carencias de persoal sanitario na Galiza débense a "situacións puntuais" ao mesmo tempo que negou o "recorte de partidas". Preguntado polas mobilizacións nas diferentes localidades da Galiza dixo que "é pola falta de profesionais" e, coma sempre, engadiu que "a culpa é do Goberno do Estado". Mais xa dixemos moitas veces, que as transferencias en materia de Sanidade tenas desde sempre a Administración galega Nos últimos meses temos recollido múltiples incidencias en distintos ámbitos da sanidade pública: Catoira, Vilagarcía, A Guarda, Oia, Tomiño, etc. A asociación A Voz da Sanidade de Cangas segue a mobilizarse como cada martes, desde o 21 de novembro do ano pasado, para denunciar os problemas estruturais que sufre a Atención Primaria na contorna: o consultorio do Hío segue fechado, a consulta de tarde do servizo de pediatría non está cuberta, faltan recursos en saúde mental, non se cobren as ausencias do persoal e a necesidade dunha ambulancia de soporte vital avanzado para a comarca mantense. Ademais, sumaranse á concentración convocada pola Plataforma SOS Sanidade Pública de Galicia para maña, 12 de abril, coincidindo co Día Internacional da Atención Primaria, diante do Parlamento galego, un acto que rematará coa lectura colectiva das 13 medidas da iniciativa popular que a plataforma considera indispensables para resolver o problema sanitario (se quixese o PP, claro). Carencias en pediatría Ademais, pacientes de oncoloxía do CHUS foron á Valedora do Pobo para denunciar que as revisións do cancro que tiñan que facer levan varios meses de atraso. Denuncian que non se cobren as baixas de médicos en hematoloxía. Un centenar de familias reclaman pediatra en Cerdedo polo menos un día por semana. Cen nenos levan anos sen pediatra e teñen que desprazarse 20 quilómetros ata Forcarei ou Cotobade, onde teñen servizo só dous días á semana. Dimite un terzo do persoal médico de urxencias de Povisa, o maior hospital concertado de Galicia. A falta de pediatras continúa sendo un problema no Barco de Valdeorras: pais e nais quéixanse pola falta de especialistas e o alcalde sumouse a concentración. Teñen só un pediatra para máis de 2.000 crianzas. Tamén Outes está recollendo sinaturas polo recorte no servizo de pediatría. Desde 2004 xa son 194 os concellos galegos sen pediatra e o cadro de persoal reduciuse un 19,8%. En Muras, estiveron 15 días sen asistencia médica: a veciñanza mobilizouse para reclamar a volta do servizo nun acto convocado polo Goberno local. A plataforma Chantada Quere Sanidade entregou 3.700 sinaturas na Consellaría para pedir melloras sanitarias, incluso no Hospital Comarcal de Monforte. Urxencia Centos de persoas asisten á concentración en defensa da sanidade pública de Valdeorras convocadas por la Xunta de persoal. Por quinta semana consecutiva, concentración de médicos no hospital de Ourense pola terrible situación crítica das urxencias. Tamén contan os colapsos repetidos nas urxencias do CHUS: até 17 "pacientes graves" agardaban en padiolas e cadeiras de rodas. En Redondela, pedir cita para consultas médicas: dez días. A Plataforma Pediátrica da Limia, di que "non pararemos ata que Xinzo conte con dous pediatras". A plataforma non descarta acampar dentro do Concello se no chegan solucións. Problemas en radioloxía no CHUAC. Nas últimas semanas veciños de Carballiño, Xinzo, Coles, Monterrei, A Mezquita, A Gudiña e Os Peares mobilizáronse para esixir unha cobertura sanitaria de calidade nos seus centros de saúde. O Sergas recoñece "falta de cobertura" no PAC de Bueu, O Grove e Vilagarcía... E o dereito ao aborto, Alfonso Rueda déixao en mans do sector privado! Acordémonos do paritorio de Verín, que se mantivo grazas a mobilización cidadá. Veciñanza do Carballiño, Xinzo, Coles, Monterrei, A Mezquita, A Gudiña e Os Peares mobilizáronse para esixir unha cobertura sanitaria de calidade. Porén temos 2.039 persoas centenarias: 75 por cada 100.000 habitantes (INE). Case como en Okinawa (Xapón) o lugar con máis lonxevos do planeta. Non faltan sanitarios, o que falta é pagarlles un salario digno, darlles a estabilidade que require a profesión e non traballar en condicións precarias que os desincentiven. E que non emigren a lugares que si prestixian a profesión. Non inventamos nada. Non son "casos puntuais". Non insulten a nosa intelixencia. A maioría absoluta non lles dá dereito a desmantelar o ben máis prezado que temos: a nosa saúde!