Soben a 432 os usuarios de residencias contaxiados tras 16 positivos nun centro en Pontedeume
Os usuarios e usuarias de residencias de maiores contaxiados con Covid-19 na Galiza aumentaron a 432 após outros 16 positivos no centro A Nosa Señora das Virtudes de Pontedeume e outros sete na residencia de maiores As Fragas na mesma localidade.
Así consta nos datos actualizados hoxe polas Consellerías de Política Social e Sanidade, nos que se indica que se detectou outra trintena de positivos entre residentes, entre eles catro na DomusVi Coruña de Oleiros; dous na Nosa Señor do Carmen de Sober; e outros dous na residencia de Pontevedra.
Ademais, rexistrouse un positivo en cada un dos seguintes centros: residencia de maiores Caser A Zapateira de Culleredo; residencia de maiores A miña Casa de Ferrol e DomusVi Monforte.
Mentres, recibiron o alta dous usuarios da residencia de maiores Viana do Bolo e outro da DomusVi Barreiro de Vigo, ademais de nove falecementos relacionados con residencias de maiores, segundo os datos concretados por Política Social.
Deste modo, as residencias con máis contaxiados na Galiza son A Nosa Señora das Milagres de Barbadás, con 84; a Residencia de Salvaterra de Miño, con 78; DomusVi Ribadumia, 59; Nosa Señora das Virtudes de Pontedeume, 40; Nosa Señora dos Anxos de Ribadavia, 33; Residencia San Cibrao de Cervo, 18; Fogar Residencial San Miguel de Silleda, 16; Residencia Os Gozos de Pereiro de Aguiar, 14; DomusVi Coruña de Oleiros, 13; Residencia Viana do Bolo, 12; Residencia As Fragas de Pontedeume, 12; Residencia Ballesol de Oleiros, 9; Residencia Santa Olalla de Boqueixón, oito; os mesmos que A Nosa Señora de Cambados.
Mentres, con sete usuarios contaxiados atópase a Residencia A Saleta de San Cristovo de Cea; cinco a DomusVi Lugo de Outeiro de Rei; e catro os Irmáns Prieto do Carballiño.
En canto aos traballadores contaxiados baixan a 247, oito menos que onte, após detectarse 14 positivos entre empregados destes centros, deles cinco na Nosa Señora das Virtudes de Pontedeume; tres na DomusVi Coruña; dous en Nosa Señora do Carmen de Sober; e dous na residencia de maiores Pontevedra de Vilaboa. E rexistrouse un positivo dun traballador en cada un destes centros: DomusVi Viveiro e DomusVi Ribadumia.