O Sergas fai a proba da COVID-19 a pacientes desde o seu coche en varias cidades

O Servizo Galego de Saúde (Sergas) implantou a realización de probas de coronavirus a posíbeis infectadas desde os seus vehículos en Vigo, un método cuxos resultados se avaliarán para analizar se é posíbel estender a súa prestación a outras áreas sanitarias.

Fontes do Sergas confirmaron a Europa Press que esta iniciativa, innovadora no Estado, lévase a cabo nun punto de fácil acceso para os vehículos situado xunto ao laboratorio do Hospital Meixoeiro da cidade olívica, onde antes estaba o servizo de urxencias, o que facilita o traslado das probas.

En concreto, estes tests realízanse, mediante cita previa, se os facultativos consideran un caso sospeitoso de coronavirus e os resultados rexístranse nos historiais médicos dos pacientes.

Deste xeito, a pasada terza feira, cando se implantou o servizo, leváronse a cabo 45 probas a posíbeis infectadas nos seus vehículos, unha cifra que esta cuarta feira ascenderá a 100, o número máximo para o que se dispón de capacidade operativa. Así, concedéronse citas previas cunha marxe de cinco minutos entre elas co obxectivo de axilizar a prestación do servizo.

Esta iniciativa tamén busca dar resposta á "saturación" do servizo de probas a domicilio polo aumento de casos, que provocou que o número de equipos que as levan a cabo pasase dun a sete, segundo precisaron as mesmas fontes. 

Ademais, esta medida permite reducir o consumo de equipos de protección individual nun momento no que "escasean". Así, as profesionais sanitarias poden utilizar un mesmo uniforme durante toda a súa xornada, mentres que nas probas realizadas a domicilio débense refugar despois de cada servizo.

A realización de tests a cidadáns desde os seus vehículos para determinar posibles casos de coronavirus tamén se leva a cabo noutros países, como Corea do Sur, Alemaña, Estados Unidos e Australia.