O Sergas busca persoas voluntarias para un ensaio clínico nunha xornada en que reabren os 'vacinódromos'
Un total de 13 recintos de vacinación masiva reabren esta quinta feira no marco da dobre campaña que desprega o Servizo Galego de Saúde (Sergas) para inmunizar contra a gripe e a Covid-19 a pacientes de entre 65 e 79 anos.
Unha vez acabada a fase de vacinación nas residencias e nos centros de saúde de referencia para maiores de 80 anos, volverán os 'vacinódromos' cunha importante novidade: ofrecerase a todos os que acudan a posibilidade de participar nun ensaio clínico.
Así, 450.000 galegas e galegos entre 65 e 79 que sexan citados para estes próximos días poderán escoller voluntariamente se recibir a vacina normal contra a gripe ou se inocularse unha de dobre dose.
Trátase dun medicamento que xa está comercializado e que xa reciben os maiores de 80 anos, polo que este estudo -capitaneado pola Consellaría de Sanidade e o Instituto de Investigación Sanitaria de Santiago (IDIS)- busca determinar se produce a mesma resposta inmune en franxas máis novas.
Este proxecto, que recibe o nome de 'Galflu', buscará que haxa polo menos 50.000 voluntarios das 450.000 persoas que están citadas para esta nova fase da campaña de vacinación.
Os que opten por participar no ensaio clínico terán un seguimento especial por parte do Sergas, que vixiará posíbeis efectos adversos a través da historia clínica electrónica, é dicir, sen que o paciente teña que acudir facer probas ou consultas específicas.
Puntos masivos
Polo xeral, os 'vacinódromos' serán os mesmos lugares de campañas anteriores, desde a irrupción da covid-19. Haberá un total de 13 repartidos polas principais cidades e vilas da Galiza.
Na área sanitaria da Coruña-Cee haberá só un, que será Expocoruña, na cidade herculina. Tamén haberá un punto único de vacinación na de Vigo, que será o Ifevi; e na de Ferrol, nun edificio anexo ao recinto de feiras FIMO.
Na de Santiago-Barbanza, habilitarase de novo a Cidade da Cultura e haberá outro lugar onde recibir as doses no hospital de Ribeira. Tamén serán dous na área de Pontevedra-O Salnés: a sala de exposicións da Delegación Territorial da Xunta en Campolongo, en Pontevedra; e no hospital de Vilagarcía de Arousa.
Na área de Lugo-A Mariña-Monforte, serán tres os 'vacinódromos' abertos. Un será o do Hospital Universitario Lucus Augusti (HULA), outro o hospital de Burela e o terceiro un espazo anexo ao IES Río Cabe de Monforte de Lemos.
Outros tantos haberá na área ourensá. Na capital, vacinarase en Expourense, aos que se suman postos de vacinación nos hospitais do Barco de Valdeorras e Verín.