Sementar, sementarei variedades do país
Moitas sementes de variedades tradicionais cultivadas durante séculos na Galiza foron substituídas nos últimos anos por híbridos comerciais e transxénicos alterados por macroempresas privadas que comercializan semente de rápido crecemento e produtividade. Arrasan así coa diversidade e fannos camiñar cara á homoxeneización global. Pola contra, afloran proxectos públicos e de entidades comprometidas co país que poñen en marcha iniciativas que marcan a diferenza, a calidade e o camiño para un agro galego produtivo, que conserve as súas variedades e estea cheo de futuro. Eis un extracto da reportaxe publicada no número 353 do semanario en papel Sermos Galiza.
Moitas delas foron substituídas nos últimos anos por variedades comerciais de sementes, híbridas e mesmo transxénicas, alteradas primeiro por organismos públicos e despois por macroempresas privadas, creando variedades novas que producen máis cantidade en menos tempo para satisfacer os intereses comerciais, mais acabando coa diversidade e as trazas diferenciais do noso campo. E as cousas non sempre saen ben, tampouco para o gran capital, pois moitas desas sementes introducidas na Galiza non prosperan e os resultados son ruinosos, xa que o clima galego ou as características do solo pouco teñen a ver coas das zonas foráneas para as que foron deseñados eses híbridos comerciais.
Unha das entidades máis representativas da Galiza que están a velar pola conservación e recuperación das variedades tradicionais é a Rede Galega de Sementes. Os seus membros gardan as variedades tradicionais e facilitan a súa propagación a outras produtoras e produtores para a súa multiplicación. Contan cun banco de xermoplasma no que albergan unha importante cantidade de sementes catalogadas.
As principais variedades antigas e locais que conservan corresponden a especies hortícolas, froiteiras e forestais autóctonas, mais tamén promoven os usos tradicionais das plantas silvestres. A rede é un proxecto colaborativo e está formada por persoas a título individual e colectivos con interese en preservar e recuperar as variedades tradicionais. Ademais, organizan encontros de sementes nos que as persoas que teñen excedentes de sementes de variedades antigas poden trocalas por outras.
A Misión Biolóxica de Galicia é un centro do CSIC que se ocupa de estudar os principais cultivos do país. A liña xeral de investigación do centro é o estudo dos procesos xenéticos, bioquímicos, metabólicos, moleculares e ecolóxicos de relevancia que permitan facer a agricultura e a silvicultura galegas máis eficientes e sustentábeis. Na Misión trabállase na mellora xenética, de resistencia e produtividade de variedades tradicionais de millo, xudía, chícharo, brásicas (coles, grelos, nabicol…) e de especies leñosas como a vide, a oliveira, o piñeiro e o carballo.
[Podes ler a reportaxe íntegra no número 353 do semanario en papel Sermos Galiza, á venda na loxa e nos quiosques]