Esta segunda feira arranca un cribado masivo entre adolescentes mediante tests de saliva
Perto de 400 farmacias de Pontevedra participarán no programa de cribado masivo deseñado pola Consellaría de Sanidade en colaboración co Colexio de Farmacéuticos. Comeza esta segunda feira e vai dirixido a adolescentes de entre 12 e 17 anos para detectar casos de coronavirus que non presenten sintomatoloxía.
En total hai 52.563 mozos e mozas desa idade con cartón sanitario do Sergas, dos que 51.479 son candidatos a participar no programa. Os descartados, 1.084 menores, cumprían algún destes requisitos: terse contaxiado nos últimos tres meses, ter mantido contacto cun caso ou residir nunha residencia para persoas con discapacidade.
A presidenta do Colexio de Farmacéuticos de Pontevedra, Alba Soutelo, detallou que a metodoloxía empregada neste programa será similar á do cribado realizado a persoas de entre 40 e 64 anos durante os meses de febreiro e marzo.
Consentimento informado
Neste caso, detallou, o consentimento informado dos menores de 12 a 15 anos deberá ser asinado por un pai, nai ou titor e só será preciso que estes acudan á farmacia co cartón sanitario dos nenos. Ademais, indicou que os mozos de 16 e 17 anos deberán acudir á farmacia se deciden asinar eles mesmos o documento.
O máximo diario de menores que se poderán incorporar ao programa é de 20 por farmacia . As mostras recolleranse só de segunda a sexta feira, aínda que se poderán entregar os tubos, tamén, en fins de semana e festivos.
Procedemento
Primeiro, o persoal da farmacia entregará o tubo de recollida da mostra. O menor será quen se encargue de recoller un mililitro de saliva ao erguerse, en xaxún, sen beber auga e sen lavarse os dentes.
Posteriormente, a mostra de saliva deberá entregarse na mesma farmacia, antes das 10:30 horas dese mesmo día. Esa mostra será trasladada pola distribución farmacéutica ao Laboratorio de Microbioloxía da área sanitaria de Vigo para ser analizada mediante PCR co método de pooling, tras o que se comunicará o resultado por vía telefónica.
A presidenta do Colexio de Farmacéuticos de Pontevedra incidiu en que o éxito deste cribado dependerá "da participación masiva dos mozos que, finalizadas as vacacións de Semana Santa, volveron ás aulas". Por iso, avanzou que se contactará cos colexios e institutos para solicitar a súa implicación e chamar a poboación adolescente a participar para "evitar brotes nos centros educativos".