Sanidade activará a segunda feira a 'autocita' de vacina para menores de 30 anos e "repescas"
A Consellería de Sanidade activará a vindeira segunda feira, día 5 de xullo, o sistema de 'autocita' de vacinación para menores de 30 anos, así como para a "repesca" de persoas de máis de 39 anos que aínda non fosen inmunizadas. Na rolda de prensa posterior á reunión do Consello, Núñez Feixoo, destacou que se busca "axustar" este sistema á programación das vacinas conforme á idade.
Segundo precisou a Consellería de Sanidade, a 'autocita' habilitarase para menores de 30 anos, así como para "repescar" ás persoas de máis de 39 anos que, por diferentes razóns, aínda non fosen inmunizadas. Na súa comparecencia ante os medios despois da reunión do Consello, o destacou que a Xunta seguirá incrementando a vacinación esta semana, na que ten previsto terminar a administración da primeira dose a todos os maiores de 40 anos.
Así, dixo que, "se se cumpren as previsións", a próxima semana o Sergas completará a inmunización de case 100.000 maiores de 40 anos e administrará máis de "60.000 primeiras doses entre 39, 38 e 37 anos". "Nalgunhas áreas xa estamos a vacinar na década de 30 a 40, empezando polos de 39 cara a abaixo", indicou.
Na súa intervención, Feixoo sostivo que, aínda que a situación está controlada "desde o punto de vista hospitalario", "empézanse a producir algunhas dificultades, incertezas e preocupacións desde o punto de vista de incidencia en persoas menores de 40 anos", sinalou.
"Se tivésemos vacinas non nos preocuparía pero isto vai como mínimo até finais de agosto. Non é fácil manter todo mes de xullo e primeira semana de agosto sen poder dispensar vacinas de forma xeralizada a persoas menores de 25 anos", afirmou.
E é que, conforme sinalou, "a día de hoxe" o que máis preocupa á Xunta son os colectivos de mozos que "aínda non están vacinados". "O grupo de risco que no seu día foron os maiores, agora cambiou, e é xustamente ao contrario, os menores. Os menores de 40 e, dunha forma especial, por horizonte de vacinación, os menores de 30 e de 20 anos", sinalou.