A veciñanza de Ribeira mantén a loita por unha sanidade pública digna
Lonxe de desistir, a veciñanza de Ribeira volveu concentrarse esta quinta feira, 18 de setembro, diante do centro de saúde da capital do Barbanza para reclamar á Consellaría de Sanidade que cubra de maneira permanente todas as vacantes de medicina de familia. Na actualidade faltan tres especialistas das 14 prazas estruturais asignadas ao ambulatorio, situación que, segundo a Plataforma en Defensa da Sanidade Pública do Barbanza, xera "atrasos inasumíbeis" na atención.
A plataforma lembrou que, ademais desas tres prazas sen cobertura, outras tres só están cubertas con contratos temporais que rematan a finais deste mes, polo que o problema "pode agravarse aínda máis".
O alcalde, Luís Pérez Barral, participou na concentración e mostrou o seu apoio á causa: "Levamos meses mobilizándonos por algo que é de xustiza, que é defender a sanidade pública e que poidamos ter persoal sanitario que nos atenda cada vez que estamos enfermas ou enfermos, nun tempo razoábel", sinalou Pérez Barral. "Non é asumíbel que teñamos que agardar máis de 15 días para sermos atendidos ou que non haxa citas en Atención Primaria", engadiu.
O rexedor lembrou que o Concello xa realizou, desde o comezo do mandato, máis de 15 peticións á Consellaría de Sanidade, tanto por escrito como por teléfono, sen recibir ningunha resposta. "Seguiremos insistindo en pedir reunións, solucións e que se escoite a Ribeira. Queremos médicos no centro de saúde e nas parroquias, porque é un dereito básico", afirmou o alcalde.
"A prioridade número un do Goberno de Ribeira é que haxa médicos suficientes", explicou Pérez Barral. "A prioridade non é o ladrillo", dixo en referencia á posibilidade de reformar o centro de saúde da localidade, "a prioridade é que teñamos profesionais que nos poidan atender".
Cadea humana
A axenda da mobilización incluíu a lectura de manifestos en defensa dun sistema sanitario público, universal e de calidade. Como nova acción, a Plataforma prepara unha cadea humana o vindeiro 11 de outubro, ás 16.30 horas, que unirá o centro de saúde de Ribeira co hospital do Barbanza e para a que precisan a colaboración de arredor de 5.000 persoas.