Os residuos de Sogama incumpren os límites legais de contaminantes
Residuos perigosos (cinzas), escouras, inertes, rexeites da planta, etc. que teñen como destino diversas ubicacións dentro e fóra do complexo de Cerceda e que “non son sequera aptos para ser depositados nun vertedoiro”.
A práctica totalidade dos residuos e refugallos de Sogama incumpren cos mínimos legais contaminantes. Así o denuncian desde a Asociación para a defensa ecolóxica de Galiza, Adega, que requeriu da administración a caracterización deses refugallos. “Residuos perigosos (cinzas), escouras, inertes, rexeites da planta, etc. que teñen como destino diversas ubicacións dentro e fóra do complexo de Cerceda, non son sequera aptos para ser depositados nun vertedoiro”, afirma o colectivo ambientalista, que denuncia que embora se superar os límites fixados pola lexislación, “Sogama estivo verténdoos durante anos nas súas instalacións da Areosa (Cerceda), así como noutros lugares que agora pretende ampliar.”
O macro-vertedoiro da Areosa acolle xa, segundo cálculos de Adega, uns 5 millóns de toneladas de lixo. Sogama precisa máis espazo para verter tanto o lixo non tratado “como os rexeites da planta, escouras, inertes (vidro e outros materiais) e mesmo residuos perigosos (cinzas da incineradora). De aí os diversos proxectos, máis ou menos camuflados como instalacións de "reciclaxe" que están a xurdir nos últimos meses”.
Incumprimento
“As analíticas ás que tivemos acceso demonstran que cando menos dende 2010, todos os tipos de refugallos enviados a vertedoiro non cumprían cos límites fixados pola normativa galega, estatal e europea”. Para Adega, esta nova volve evidenciar “o perigoso do modelo Sogama, baseado na incineración e o vertido, que a Xunta teima en defender a costa da saúde do medio ambiente e das persoas”.