Reclaman máis atención e visibilidade para as pacientes con linfedema, que afecta unhas 100.000 persoas na Galiza

A Asociación Galega de Linfedema (AGL) reclama máis atención, investigación, información e visibilización para as pacientes con esta enfermidade que implica a acumulación de líquido linfático no corpo e que afecta a uns 100.000 galegos e galegas, segundo as súas estimacións, e da que hoxe se conmemora o seu día mundial. 

"A pesar de ser un número considerábel de persoas afectadas por esta patoloxía, non se lle presta a importancia que merece", denuncia nun comunicado esta entidade que tamén se dedica a pacientes con lipedema, insuficiencia venosa crónica e tamén outras patoloxías vasculares periféricas.

O presidente e fundador da AGL, Juan Manuel Lameiro, reivindica o labor desta asociación fundada dese Vilagarcía de Arousa (O Salnés) en 2004, cando a información sobre o linfedema "era practicamente inexistente", salvo algunhas publicacións que había en Internet "no idioma inglés". 

Máis visibilidade

Polo Día Mundial do Linfedema –que a asociación aproveitará para organizar talleres e campañas informativas–, Lameiro aproveita para facer un chamamento á sociedade e ás Administracións para darlle visibilidade ás necesidades duns e dunhas pacientes que, a día de hoxe, "non están cubertas". "Non sabemos o número real de persoas con linfedema, lipedema e insuficiencia venosa crónica, onde están esas 100.000 persoas con linfedema na Galiza?", pregunta. 

Ademais, Lameiro denuncia que "non se inviste" en investigación, nin tampouco hai "suficientes profesionais preparados", nin o tratamento "chega a todas e todos" os que o necesitan, entre outras carencias. Por todo isto, a AGL reclama que haxa no Sergas unha estratexia de linfedema.