'Producir', o suplemento de 'Nós Diario' de información económica, arrancou este sábado
Producir publícase este sábado con Nós Diario para ofrecer información económica nun momento en que resulta de especial importancia achegar análises á sociedade e espazos de reflexión para o contraste de ideas e a formulación de alternativas. O suplemento estará dispoñíbel nos quiosques até esta segunda feira.
Bernardo Valdés, profesor da USC pregúntase no inicio deste suplemento se é Galiza un país agrario. Xabier Pérez Dávila desvela o que Europa debería aprender da China e o que a China debería aprender de Europa sobre COVID-19 e 5G. Adrián Dios analiza o papel do Estado fronte a pandemia, e Eduardo Míguez, director adxunto do Porto de Celeiro explica por que ten tanta sona a pescada.
O suplemento, catro páxinas a cor e con deseño de Pepe Barro, pretende ser un espazo para analizar e divulgar con expertos e expertas de primeira orde a realidade dos sectores produtivos, do tecido empresarial e do mercado de traballo.
Entre as colaboradoras e colaboradores atópanse docentes de economía das universidades galegas e persoas significadas no ámbito dos estudos económicos. En materia pesqueira o suplemento contará coas sinaturas de María do Carme García Negro ou Gonzalo Rodríguez; en políticas agrarias, de Edelmiro López Iglesias, Mar Pérez Fra, Bernardo Valdés, Xavier Simón ou Xosé Carballido; en cuestións industriais, de Adrián Dios ou Anxo Calvo e en políticas públicas e fiscalidade, con Xosé Díaz Antón Beiras Cal, Joam Romero Duram, Aleixo Vilas, Manuel Barbeitos, Xabier Pérez Davila ou María Cadaval.
Suplementos diarios de carácter temático
Coñecer, Aprender, Xogar, Gozar e Producir publicaranse de terzas feiras a sábados co diario para ampliar a información relativa a patrimonio, historia, arte, ciencia, educación ambiental, ensino, actividade física, gastronomía, enoloxía, viaxes, sectores produtivos e iniciativas empresariais, entre outros. Unha aposta de Nós Diario no marco da celebración dos seus cen primeiros números en papel.