O prezo do monte encareceu até 60% na última década
A terra, rústica, agraria ou de monte, revalorízase na Galiza, nunha tendencia que se constata tanto no aumento durante estes últimos anos do prezo dos terreos como no incremento das operacións de compravenda. O Observatorio Galego de Mobilidade de Terras 2021 recolle como o incremento do prezo do monte foi de até 60% desde 2013.
A necesidade de novos pastos para a gandaría, o crecemento do sector do viño, o puxante negocio da madeira.... varios son os factores que conflúen para explicar como desde 2013 os prezos da terra na Galiza rexistran aumentos notábeis. O Observatorio de Mobilidade de Terras, organismo dependente da Axencia Galega de Desenvolvemento Rural (Agader), recolle que son os terreos de monte os que amosan unha evolución máis clara, cun incremento sostido que levou os prezos do 2019 a 60% por riba dos niveis de 2013, chegando aos 0,83 euros o metro cadrado (m²).
Superficie agraria
En canto aos terreos da superficie agraria útil (SAU), sen teren superado o máximo rexistrado en 2017 —desde o comezo da serie en 2008—, mantivéronse elevados, sobre 1,8 euros/m². No último lustro analizado o incremento foi de 36% para o conxunto do país.
No relativo ao prezo da terra rústica, os datos corroboran o mantemento da suba iniciada en 2014 e que sitúa os valores medios de 2019 en 1,21 euros por m², o que supón un incremento do prezo da terra de 53% con respecto a 2013. En 2019 realizáronse perto de 39.000 compravendas afectando case 11.500 hectáreas (has), cun aumento notábel do tamaño das parcelas.
O monte tivo maior peso na superficie obxecto de compravenda, case 7.000 hectáreas, mais en menor proporción que en anos previos. De superficie agraria útil houbo máis de 18.700 operacións de mobilidade, que atinxiron 4.502 hectáreas.
As maiores taxas de mobilidade seguen a concentrarse na metade norte da Galiza, tanto para superficie agrícola como para superficies de monte. Destacan tamén as comarcas do Deza e do Salnés en Pontevedra, especialmente no caso da SAU.
O reto da superficie útil
A Galiza perdeu nos últimos 30 anos máis de 150.000 hectáreas produtivas, o que supón 20% da súa superficie agraria útil, e ten aproximadamente 900.000 hectáreas "a monte".
A superficie agraria útil non chega a 25% do territorio, o que supón unha das porcentaxes máis baixas de Europa. A media no Estado español é de 47% e na Unión Europea sobrepasa 40%.
Ademais, e de non variar a actual tendencia, en dez anos a Galiza perderá un terzo da súa superficie de cultivo. Esta é a advertencia que se fixo en 2020 desde o Centro Común de Investigación da UE: en 2030, os terreos agrícolas do noso país serán 35,5% menos que agora. Os científicos da Comisión sinalan Galiza como o territorio do Estado que máis vai sufrir esta perda de superficie de cultivo.
A superficie de cultivos para alimentación humana na Galiza representa só 4% do territorio, o que bate tamén coa porcentaxe coa mesma fin que hai no Estado: 26%.