Máis de 100 rapaces galegos, positivos en Covid polo foco de Baleares
A maioría deles, 89, pertencen á provincia de Pontevedra, sendo a metade deles positivos na variante Delta
Galiza suma xa un total de 102casos positivos asociados ao foco ligado con viaxes de estudos realizados a Baleares.
A Consellaría de Sanidade informa da existencia de 102 rapaces que deron positivo por covid-19 como consecuencia do foco de Baleares. A maioría destes casos, concretamente 89, pertencen á provincia de Pontevedra, sendo a metade deles positivos na variante Delta.
O conselleiro de Sanidade, Julio García Comesaña, fai un chamamento aos mozos e mozas para que acudan aos cribados, xa que é fundamental para controlar a expansión do virus.
Lembra, ademais, que o uso da máscara é obrigatorio en interiores e no exterior cando non se poida garantir a distancia de metro e medio.
Por outra banda, García Comesaña confirmou coa conselleira de Saúde do Goberno balear que no mínimo 18 galegos permanecen illados nun hotel de Mallorca, tras confirmar que interaccionaron nas festas, que supostamente foron a orixe do foco.
Ademais de interesarse polo estado dos rapaces galegos, o titular de Sanidade ofreceu a colaboración da Xunta para atallar canto antes o surto.
Un equipo de enfermería da área sanitaria de Santiago de Compostela e Barbanza desprazarase esta terza feira ao aeroporto da Lavacolla para ofrecer probas PCR aos estudantes que chegan de Baleares.