Pornografía e falta de educación afectiva, as principais causas do aumento de agresións sexuais en menores
Save The Children advertiu de que algunhas das causas que se atopan detrás do incremento en máis de 100% das agresións sexuais cometidas por menores de idade no Estado español son o acceso a unha "pornografía" que mostra "situacións de violencia" e a "falta de educación afectivo sexual".
"Unha das causas detrás do aumento das agresións sexuais entre adolescentes é o acceso a unha pornografía que representa situacións de violencia e de desigualdade", apuntou a directora de Incidencia Social e Política de Save the Children, Catalina Perazzo.
A Memoria da Fiscalía Xeral do Estado (FXE) revelaba que se produciu un "alarmante" incremento de 116% das agresións sexuais perpetradas por menores no Estado no último lustro, entre o ano 2017, cando se rexistraron 451 casos, e 2022, cando houbo 974.
Aínda que desde Save The Children consideran que fai falta levar a cabo "unha investigación máis detallada" sobre as causas deste aumento, achácao ao "consumo de pornografía" así como á "falta de educación afectivo sexual".
En todo caso, a ONG de infancia tamén sinala que pode deberse a que existe "unha maior detección" por parte dos profesionais e unha maior "concienciación" das adolescentes nas súas relacións.
Desta forma, segundo Perazzo, a violencia "detéctase ou párase antes".
Amplo acceso a pornografía
Segundo os datos de Save The Children, 7 de cada 10 adolescentes teñen acceso á pornografía e un 30% asegura que é a única fonte de educación afectivo sexual que teñen. "Por sorte -apunta Perazzo- eles mesmos danse conta de que necesitan outro tipo de información e case 50% así o pide".