Pontón reclama un "pacto pola ciencia" e un Plan para recuperar "músculo industrial" con "emprego de calidade"

A portavoz nacional do BNG, Ana Pontón, volveu a reclamar esta quinta feira un "pacto pola ciencia" na Galiza e unha aposta decidida para gañar "músculo industrial", con "emprego de calidade" e unha actividade sostíbel.

Así o trasladou tras realizar unha visita á planta de Ceamsa no Porriño (comarca de Vigo), e insistiu en que Galiza necesita aumentar o seu peso industrial até o 25 %, "apostando por empresas innovadoras, por empresas sostíbeis" que permitan dar un mellor futuro aos galegos e galegas. Respecto diso, reiterou a demanda do BNG de pór en marcha un Plan de apoio tecnolóxico e industrial porque é "un obxectivo irrenunciábel" que Galiza "gañe músculo" neste ámbito, e así crear "emprego de calidade", apostando por empresas e industrias innovadoras, con base tecnolóxica.

Igualmente, incidiu na importancia de incrementar até o 2,5 % o peso da ciencia, innovación e tecnoloxía no PIB galego, xa que actualmente o país está nunha porcentaxe que é "a metade" con respecto a outros países europeos. "Este é un reto fundamental", subliñou Ana Pontón.

A portavoz nacional do BNG tamén avogou pola creación dun instituto, Innogal, como ferramenta de captación e retención de talento, con investimento, e que sirva de "revulsivo" no ámbito económico, xa que a innovación, a ciencia e o desenvolvemento tecnolóxico "son piares chave para o futuro" da Galiza.

Finalmente, Pontón incidiu na importancia de que a enerxía "sexa un factor que se poña ao servizo da sociedade, das familias, das empresas e ao servizo das industrias", por iso volveu a reclamar "unha tarifa eléctrica galega" que permita abaratar a factura da luz, e que Galiza sexa compensada por ser unha zona exportadora de enerxía.

"Que se nos compense polos custos ambientais e sociais, porque é evidente que os hai; e sabemos que unha rebaixa na factura da luz significa un elemento moi potente de mellora da competitividade e á hora de atraer empresas, para que Galiza poida gañar ese músculo industrial", resolveu.