A poboación maior de 64 anos supera en máis de 160% a menor de 20 anos na Galiza

Galiza fechou 2022 con 2.690.464 habitantes; deles, 702.630 sumaban máis de 64 anos e 418.840 non chegaban a 20 anos. Neste sentido, esta última franxa de poboación colocábase en 15,5%, rexistrando no seu conxunto unha das taxas de envellecemento máis elevadas da Unión Europea (UE). A poboación galega descendeu en 41.436 persoas no que vai de século. Ademais, os residentes maiores de 64 anos incrementáronse desde 2000 en 147.555 persoas e en 5,8 puntos porcentuais. Ao tempo, as galegas e galegos menores de 20 anos minguaron en 91.877 habitantes e en 4,6 puntos. Os residentes na Galiza maiores de 64 anos representan o 26,1% do censo e exceden en 167,6% os menores de 20 anos. Ademais, a poboación nesta última franxa de idade non supera o 12% da veciñanza en 264 concellos. Ao tempo, as persoas en idade de xubilación superan as menores de 30 anos en 233 concellos galegos, representan o 40% do número total de residentes en 78 localidades e alcanzan máis de 50% nalgúns municipios da área oriental do país. A poboación galega menor de 15 anos reduciuse 40% desde 1990 As peores cifras rexístranas as circunscricións de Ourense e Lugo. Segundo os datos achegados polo Instituto Galego de Estatística (IGE) para 2022, Ourense declara 304.280 residentes, 40.961 menos que no exercicio de 2000, representando a poboación maior de 64 anos o 31,9% do total. Ademais, as persoas menores de 20 anos representan 13,3% do censo e suman 40.280 habitantes, 7.817 dos cales contan entre cero e 4 anos e 10.004 entre 5 e 9 anos. 122.544 ourensás emigraron nos últimos 10 anos 122.544 residentes das comarcas ourensás emigraron nos últimos 10 anos. O 54,9% do total deste movemento de poboación deuse no ámbito da circunscrición e con destino aos principais núcleos urbanos da mesma. Porén, o 21,6% dirixiuse fóra da Galiza, destacando este grupo por estar formado, maioritariamente, por persoas de idade inferior a 35 anos. Na Galiza residen máis de 163 persoas maiores de 64 por cada 100 menores de 20 A natalidade caeu en picado naqueles concellos máis envellecidos como consecuencia do fenómeno migratorio. A este respecto, a súa baixada desde o comezo do século alcanzou o 23% no total da circunscrición, pasando de 1.809 partos en 2001 a 1.339 en 2021. Nos municipios da Arnoia (O Ribeiro), A Pobra de Trives e Chandrexa de Queixa (Terra de Trives), A Teixeira e Parada de Sil (Terra de Caldelas), Calvos de Randín (A Limia), Gomesende (Terra de Celanova) e Lobeira (Baixa Limia) non naceu ningunha crianza en 2021. Os datos de Lugo gardan semellanza cos de Ourense. Así, a circunscrición luguesa perdeu 41.630 habitantes no que vai de século, fechando 2022 con 323.989 residentes. Neste caso, a poboación maior de 64 anos suma 96.979 persoas e representa o 29,9%. A menor de 20 anos atinxe 43.682 persoas e o 13,5% do total do censo. A emigración afectou duramente a Lugo na última década. Segundo os datos achegados polo Instituto Nacional de Estatística, de 2011 a 2021 emigraron 113.710 persoas, 44% delas dentro da propia provincia, 22,6% a outras partes do Estado español e 10,2% a outros territorios da UE. Ourense e Lugo entre os cinco territorios máis envellecidos da UE Ourense e Lugo atópanse entre os cinco territorios máis envellecidos da UE. Nesta dirección, a oficina estatística da UE, Eurostat, acaba de facer públicas as cifras de envellecemento no espazo comunitario, sinalando que as áreas con menos poboación moza de toda a UE son, por esta orde, Zamora, Ourense, Alto Támega en Portugal, Lugo e Shul en Alemaña. A emigración explica parte devalo demográfico da Galiza nas últimas décadas. Nesta liña, o profesor da Universidade de Santiago de Compostela (USC) Isidro Dubert destaca, en conversa con Nós Diario, que “as implicacións da emigración son moito máis graves que as do envellecemento”. Apunta que a marcha da mocidade “constitúe unha notábel perda demográfica para un país no que as actuais xeracións de xente nova son moi pequenas a causa do impacto combinado das emigracións pasadas, do remate da transición demográfica e da modernización social acaecida tras 1975. Unha marcha, polo demais, non compensada pola inmigración de retorno, composta na súa meirande parte por persoas xubiladas que pouco poden achegar no plano produtivo ou demográfico”. Galiza perderá 300.000 habitantes até 2035 Un estudo elaborado polos investigadores da Universidade de Vigo Alberto Vaquero, Sara Fernández, Luís Espada e Víctor Martínez e publicado en 2020 polo Foro Económico da Galiza concretaba que a emigración de 2.000 mulleres menores de 29 anos implica 1.500 nacementos menos, ao ser a taxa de fecundidade galega recoñecida polo IGE de 1,12. Tendo en conta que entre 2009 e 2021 marcharon da Galiza 48.375 mulleres menores de 29 anos, como consecuencia da emigración xuvenil, deixaron de nacer 36.281 persoas. O desmantelamento do complexo agrogandeiro O panorama demográfico actual non se pode separar, tampouco, do desmantelamento do complexo agrogandeiro, asociado ás consecuencias de integración no Mercado Común e á reestruturación agraria no espazo da Europa comunitaria. A economista da USC María do Mar Pérez Fra, en conversa con Nós Diario, afirma que “a situación actual pon en evidencia o proceso de reestruturación agraria que provocou unha perda de emprego na agricultura que non veu acompañada doutras alternativas laborais no rural. Un factor fundamental para min é non contar cun sector potente na agroindustria, que feche os ciclos produtivos”.