Pfizer, Moderna... Que vacina é máis efectiva contra a Covid?

Un novo estudo realizado por persoal investigador da Facultade de Medicina da Universidade Case Western Reserve (EUA) vén de revelar que as persoas que reciben a vacina de Moderna contra a Covid-19 teñen menos probabilidades de infección que aquelas a quen se lles administra a de Pfizer-BioNTech. A investigación, publicada na revista científica Journal of the American Medical Association, tamén determinou que quen recibiron a vacina de Moderna tiñan menos probabilidades de ser hospitalizados. O estudo examina as infeccións por SARS-CoV-2, as hospitalizacións e as taxas de mortalidade cando o variante Delta era predominante. Neste documento estúdanse os rexistros sanitarios electrónicos de máis de 637.000 pacientes totalmente vacinados de 63 organizacións sanitarias do conxunto dos Estados Unidos de América (EUA), que abranguían diversas zonas xeográficas, idades, etnias, niveis de ingresos e grupos de seguros de saúde, xa que neste país carece dun sistema sanitario público e universal. Os datos incluíron as infeccións de coronavirus que se produciron en vacinados entre xullo e novembro de 2021, cando Delta representou case todos os casos. Incluíronse os incidentes de infeccións por irrupción se a persoa non se infectou previamente con Covid-19 ou recibira unha vacina de reforzo. O equipo tivo en conta os datos demográficos, os determinantes sociais da saúde, os transplantes e as comorbilidades. Tamén se compararon as taxas de hospitalización dos pacientes nos 60 días seguintes á infección por Covid-19. Os resultados mostran que a taxa de incidencia mensual de casos de ruptura foi maior nos que recibiron a vacina de Pfizer, en comparanza coa de Moderna. Por exemplo, os datos mostraron 2,8 casos nos vacinados con Pfizer, a diferenza dos 1,6 casos por cada 1.000 persoas en novembro de 2021. "Ambas as vacinas son altamente protectoras", aclaran A taxa de hospitalización a 60 días foi de 12,7% para os receptores de Moderna e de 13,3% para os de Pfizer. Con todo, non se observaron diferenzas significativas nas taxas de mortalidade entre os que recibiron cada fármaco. "Aínda que hai unha diferenza no que atinxe ás infeccións, ambas as vacinas son altamente protectoras contra a infección por SARS-CoV-2 e, especialmente, contra as consecuencias máis graves da infección", comentou unha das científicas responsábeis do traballo, Pamela B. Davis.