As persoas LGBT+ no ámbito científico

Recentemente conmemorouse o Día Internacional do Orgullo LGBT+, que decorre mundialmente cada 28 de xuño co fin de reafirmar un sentimento de orgullo polas diferentes identidades de xénero e orientacións sexuais historicamente oprimidas e marxinadas e coa finalidade de loitar pola defensa dos seus dereitos e pola súa visibilización na sociedade. Nalgunhas cidades, esta celebración do Orgullo amplíase a unha semana ou mesmo a un mes, sendo xa considerado xuño como o mes do Orgullo. Escolleuse este día, 28 de xuño, con motivo dos disturbios que tiveron lugar en Stonewall, en 1969. Desde entón é considerada a data na que por primeira vez o colectivo LGBT+ se uniu para loitar polos seus dereitos nos Estados Unidos. Naquela madrugada do 28 de xuño producírase nun dos bares da zona de Greenwich Village, en Nova York, unha das moitas redadas policiais, tan comúns naquela época, na que se detiñan a todas as persoas que estiveran vestidas como o xénero oposto ao seu. Nesta ocasión, estas persoas non aceptaron identificarse e negáronse a marchar cos oficiais. O pub, denominado Stonewall Inn, resultou ser o epicentro arredor do cal se desenvolveron as numerosas manifestacións e protestas sucedidas ao longo do día do 28 de xuño, algunhas algo violentas, ás que concorreu gran parte da comunidade LGBT+ co fin de defendérense contra os ataques ás persoas “non normativas”, provocados por un sistema intolerante coa diversidade. Foi a raíz dos disturbios de Stonewall cando se afianzou o colectivo recoñecido actualmente, que xerou unha repercusión tan grande internacionalmente que, a partir do ano seguinte, 1970, comezaron a celebrarse as primeiras marchas a prol do orgullo LGBT+ nas cidades de Los Angeles e Nova York, ás que se lle sumaron outros lugares de todo o mundo. A raíz destas protestas e destas primeiras manifestacións para reivindicar os dereitos da comunidade, foron xurdindo novos días referenciais para a normalización do colectivo co fin de defender a diversidade en calquera ámbito da sociedade, como o Día da Visibilidade das diferentes cores que forman o arco da vella da bandeira LGBT+, o Día Internacional contra a Homofobia no Deporte, o Día para Saír do Armario ou o Día pola Despatoloxización da Transexualidade, entre outros moitos. Deste modo, naceu o 5 de xullo como o Día internacional do Colectivo LGBT+ no STEM (acrónimo anglosaxón das disciplinas da ciencia, tecnoloxía, enxeñaría e matemáticas). Unha celebración que nace en 2018 Esta reivindicación da presenza da comunidade LGTBI na ciencia comezou a conmemorarse no ano 2018 e está organizada por asociacións relacionadas co colectivo e cos diversos ámbitos científicos, e conta co apoio de organizacións como a Axencia Espacial Europea e co Centro Europea para a Investigación Nuclear (CERN). Coa celebración do 5 de xullo non só se pretende mellorar a situación de traballadores e traballadoras que pertencen ao colectivo LGBT+, senón tamén a do estudantado de calquera rama científica, e defender que as capacidades de cada un e cada unha non dependen do xénero nin da orientación sexual dos científicos e científicas. Ademais, tamén procura buscar referentes do colectivo que traballen en ciencia e crear conciencia para aumentar a diversidade e a inclusión no ámbito científico. Nos últimos anos fóronse dando pequenos pasos cara á igualdade mais aínda totalmente insuficientes. Poucas mudanzas no mundo da ciencia Javier Armentia, creador da web Ciencia LGBT+, asegura nunha entrevista a Servizo de Información e Noticias Científicas (SINC), que “a sociedade está cambiando pero, curiosamente, a ciencia fíxoo pouco”. Neste sentido, cómpre destacar os resultados que achegou o autor dun estudo publicado en 2018 na revista científica Science Advances, Bryce Hughes, investigador da Universidade de Montana, que reflicten a discriminación que sofren as persoas do colectivo nas diferentes áreas científicas. As mulleres pertencentes á comunidade LGBT+ non se ven normalmente forzadas a deixar os seus traballos a diferenza dos homes deste colectivo. O investigador explica este paradoxo argumentando que “as mulleres lesbianas ou bisexuais son estereotipadas como ‘máis masculinas’, mentres que os homes gais e bisexuais son considerados ‘máis femininos’”. Isto non só constata a discriminación do colectivo LGBT+ na ciencia, senón tamén o machismo arraigado nos ámbitos científicos, dous estigmas sociais de urxente erradicación, ao ser considerada como unha característica positiva a masculinidade das mulleres. Sexa como for, constátase unha moi pequena presenza da muller dentro deste campo, e máis aínda da muller pertencente á comunidade LGBT+. Coa celebración do 5 de xullo tamén se pretende buscar referentes do colectivo que traballen en calquera rama da ciencia e crear conciencia para aumentar a diversidade e a inclusión no ámbito científico A desigualdade de oportunidades entre homes e mulleres nos diferentes ámbitos do STEM aínda non se reverteu, polo que se volve urxente un posicionamento do mundo científico nun asunto tan relevante como o dos dereitos humanos. O Día do Colectivo LGBT+ na ciencia supón unha celebración recoñecida en numerosos países, entre os que se atopan os europeos, entre eles o Estado español; porén, na Galiza aínda non está moi afianzado, aínda que no día de onte, infelizmente a data coincidiu coas mobilizacións que decorreron en ducias de vilas e cidades para protestar contra o asasinato de Samuel, o mozo de 24 anos asasinado na Coruña, e contra a LGBTfobia. Na Galiza déronse pasos moi importantes no que ao recoñecemento social do colectivo se refire, como o proxecto que recolle os testemuños orais para a elaboración de historias que conformen unha memoria LGBT+ nos museos de Lugo, ou a publicación do libro Nós, xs inadaptadxs. Representações, desejos e histórias LGBTIQ na Galiza, unha recompilación de artigos e relatos arredor da Galiza LGBT+. Porén, cómpre seguir avanzando no tema dándolle especial visibilidade a días referenciais como o 5 de xullo.