O persoal de Urxencias de Santiago manifestarase pola “dignidade” do servizo
Os conflitos agroman e reprodúcense por todos os recantos e servizos da sanidade pública. A Xunta de Feixoo recolle o que vén sementando ao longo dunha década de recortes e reorganización neoliberal do sistema. A manifestación que o persoal de Urxencias do Hospital de Santiago convocou para o 9 de xaneiro é apenas un novo síntoma.
As traballadoras e traballadores de Urxencias do CHUS levan oito semanas de folga indefinida. Portestan pola precariedade laboral e a asfixia económica ás que os somete o Sergas. “A xerencia da área sanitaria sabe que o plan funcional implantado até agora non é viábel por mor da escaseza de persoal”, argumenta o comité de folga.
Para reclammar unhas “Urxencias dignas”, a representación dos traballadores chama á cidadanía a se manifestar en Santiago de Compostela o vindeiro 9 de xaneiro, a partir das 19.00 horas na Praza Roxa. “A sanidade pública é de tod@s, en ti está saír defendela”, di a palabra de orde.
A problemática de Urxencias do Hospital de Santiago é unha máis dunha sanidade pública cuxas traballadoras e traballadores están a protestar pola redución orzamentaria e de condicións laborais en ámbitos tan diversos como a medicina de familia, os PAC ou as ambulancias.