A pandemia agrava a "crise demográfica" da Galiza

Un informe do Observatorio Galego de Dinamización Demográfica de xaneiro deste ano, remitido ao Parlamento pola Consellería de Política Social no marco da comisión impulsada para a reactivación económica e social da Galiza, ratifica que a pandemia introduce novas ameazas para a crise demográfica que haberá que afrontar con medidas como o reforzo da acción pública garantindo a participación "activa" da administración local.

O documento incorpora unha análise 'DAFO' -de debilidades, ameazas, fortalezas e oportunidades- derivado da irrupción da Covid-19 e os seus efectos na Comunidade. Entre as debilidades, por exemplo, sitúa as limitacións derivadas "da falta dunha comprensión en profundidade do cambio demográfico".

Pero tamén ratifica que a pandemia "está a agravar o xa acusado atraso na emancipación residencial e na autonomía persoal" nos máis novos, apunta á "deficiente atención" ao papel dos maiores na sociedade e alerta do "incremento da preexistente inestabilidade e precariedade laboral" dunha parte "importante" da poboación, as dificultades de conciliación ou as dificultades de mobilidade e o freo á inmigración.

De feito, no apartado de ameazas, aínda que alude á "carencia de datos", de momento, que permitan determinar o impacto exacto da Covid-19, si apunta que se espera no "curto prazo" un descenso da natalidade (xa moi baixo) debido a resposta da mesma "aos shocks económicos e ao desemprego", así como ao "maior atraso na emancipación da mocidade".

A todo iso súmase o clima de incerteza económica, pero tamén "de toda índole", xerado pola pandemia, acompañado dun incremento da vulnerabilidade e da percepción de inseguridade.

Pero ademais constátase que a actual pandemia pon en evidencia "as vulnerabilidades dunha poboación en proceso de envellecemento aínda que se descoñece se se se vai a alterar a tendencia xeral positiva da esperanza de vida".

E para afrontar esta ameaza, o Observatorio expón varias cuestións, como trasladar á sociedade que todas as persoas son "vulnerábeis" e que é "fundamental" a responsabilidade individual dentro do colectivo, na procura "do ben común". E tamén dar outros pasos, como visibilizar o cambio no perfil sociolóxico da vellez ou atender aos efectos derivados da "feminización" da vellez.