Sermos alcanza o número 300: o papel co que contar un país
O 8 de xuño de 2012 publicábase o primeiro número de Sermos Galiza, o medio que supuxo o retorno semanal do galego aos quioscos. 300 números despois, o proxecto informativo continúa coa súa cita semanal con subscriptoras e lectoras,, medrando, atendendo a realidade dun país que tamén quer existir no papel.
María Obelleiro, directora do semanario, considera que “o feito de que Sermos leve seis anos na rúa e de que a empresa estea facendo o esforzo de tratar de sacar adiante un diario evidencia a grande evolución ao longo deste tempo”. Isto é posíbel, engade, “grazas a toda a Comunidade Sermos”.
Comunidade Sermos
Unha comunidade ampla, variada e heteroxénea, formada por accionistas, persoas colaboradoras, empresas e institucións que se publicitan... e subscritoras e lectoras, o elo fundamental.
Diego Boquete foi o primeiro subscritor do semanario. “Tan pronto me enterei de que ía saír un medio en galego e vin posibilidade de apoiar, fíxeno”, lembra. “É importante ter un medio en galego, que conte e informe desde aquí”. Desexa maior proximidade á actualidade, de aí que aplauda a iniciativa de ter un diario: “agardo que se consiga e que sexa unha realidade”.
Henrique Monteagudo fíxose subscritor recentemente. “Dei o paso porque creo que é imprescindíbel ter un medio como Sermos Galiza, con información en galego, crítica e variada. E que estea en papel é para moita xente algo importante”. Mira o futuro con optimismo: “Estou convencido de que hai demanda dun medio galego”. Por iso acredita que Sermos O Diario Galego será unha realidade.
Pousar os ollos
Marta Sobradelo gosta atopar o Sermos Galiza. “Non estou subscrita nin o compro”, explica, “mais léoo na biblioteca ou se non, no bar onde tomo o café, que o teñen”. Gosta do semanario porque “é diferente ao resto e non só por estar en galego, senón polo que conta e como o conta”.
Unha afirmación que encadea coa reflexión que realiza Xoán Costa: “A importancia de Sermos para a normalidade do idioma é total. Mais non só para a lingua, tamén para a cultura, a recuperación da memoria e para desvendar certos tópicos que negan as nosas capacidades como país, como sociedade con capacidade para se autovaler”. Liña na que afonda a directora do semanario: “Somos a publicación actual das que hai en papel e en galego que máis números leva publicado: 50 cada ano, e sumamos xa 300, e a única opción de atopar a lingua nos quiosques cada semana. Na medida en que somos un medio de intereses galegos, contribuímos a facer país, a difundir unha axenda temática propia, centrada na Galiza, sobre temas que nos interesan a todas e todos e que se botan en falta nos medios de comunicación tradicionais: feminismo, lingua, cultura, traballo, ecoloxismo…
Confianza
Van aló 300 números desde aquel primeiro exemplar. Desde entón, centos de entrevistas, de reportaxes, de crónicas. Centos de opinións e colaboracións, de críticas literarias, musicais ou de cinema. En base a todos eles foi medrando a confianza de que é posíbel ter un diario en galego nos quiosques. “Estaría ben”, recoñece Marta: “ao fin e ao cabo Galiza non pode resumirse nunha vez á semana”.
Ampliar e alargar
Sermos O Diario Galego é a evolución natural do xérmolo que en 2012 prendeu en Sermos Galiza. Máis de 900 persoas accionistas, as persoas subscritoras e as empresas anunciantes afortalaron un proxecto que permite marcarse como obxectivo o de ter un diario galego. Enriquecer, alargar e ampliar o espazo comunicacional galego desde nós e para o mundo. En papel publicarase con 32 páxinas e a cor de terza a sábado, durante os cinco días consecutivos. A maiores, os sábados, levará encartado un suplemento de fin de semana, Sermos Galiza, con outras 32 páxinas. En total o diario sairá 258 días ao ano.
“Debe ter a capacidade para concitar vontades e integrar intereses arredor de Galiza”, considera Víctor Freixanes, presidente da Real Academia Galega. “É absolutamente necesario para coñecer o país”, mantén Carlos Mella, da Fundación Castelao. Para Antía Otero, poeta e editora, “fai falta un diario en papel que nos dea unha contrainformación”. “Precisamos un diario cunha sección cultural asentada no país”, defende Comba Campoi, actriz e xornalista. Estas voces son apenas uns poucos exemplos das esperanzas sobre o novo diario.
3.000 subscricións antes do 31 de xullo
Para facelo viábel economicamente e unha realidade en 2019 son necesarias 3.000 subscricións antes do 31 de xullo deste 2018. Estamos na conta atrás!