A Domus da Coruña 'xubila' o vídeo do parto que "traumatizou" miles de estudantes desde 1995

Durante os últimos 27 anos as excursións escolares ao museo científico Domus da Coruña caracterizáronse pola advertencia que durante a viaxe en autobús o alumnado máis experimentado lanzaba ás rapazas e rapaces que aínda non estaban 'curtidos' nesta tradicional visita: "O vídeo do parto vaivos traumatizar!".

Mais, a pesar de todo, aquel vídeo era unha parada obrigada para todas e todos os visitantes e, probabelmente —cando menos para o estudantado— o principal atractivo do museo. Querían coñecer de primeira man iso do que os 'maiores' da escola falaban sempre. Agora, case tres décadas despois, e logo de ficar parada a súa reprodución nas últimas datas, o Domus renova o material audiovisual referido ao parto.

"Nós sabiamos que o vídeo do parto era un dos grandes atractivos do museo, pero non esperabamos que tivese tanta demanda", apuntou esta segunda feira a directora técnica do centro, Patricia Barciela.

O vídeo proxectárase desde 1995 a milleiros de escolares de todo o país

Nun acto decorrido en horario de mañá ao que asistiron a alcaldesa, Inés Rey, e o ex director do centro, Moncho Núñez, os directivos subliñaron que a proxección no ano 1995 dun parto explícito "en aberto e para todos os púbicos" supuxo unha novidade que "a día de hoxe segue sen ter analoxías noutros grandes museos".

"Este módulo do parto foi pioneiro no coñecemento do ser humano, amosando de forma gráfica o principio do mundo", engadiu a rexedora.

Dous novos vídeos

O módulo do parto da Domus contará a partir de agora nas súas instalacións con dúas novas pezas audiovisuais: un vídeo cedido polo Servizo Galego de Saúde (Sergas) e un fragmento da película 'Quen a ferro mata', de Vaca Films.

Ambos os vídeos son partos "reais e naturais" que mostran "de forma explícita" un parto, apuntou Barciela. "Queremos seguir ampliando o número de pezas para ensinar a diversidade", engadiu. Moncho Núñez.