Nula presenza de profesorado ou tituladas na Galiza para impartir cursos de Feuga

A Fundación Empresa-Universidade Galega (Feuga) é unha entidade sen ánimo de lucro e de dereito privado fundada en 1982 e especializada na transferencia de coñecemento, innovación e tecnoloxía desde o sistema universitario da Galiza ao mundo empresarial e a sociedade en xeral. Así se define ela propia. Detrás da fundación están as tres universidades galegas canda unha serie de "empresas, start-ups, emprendedores e diferentes actores públicos e privados". En palabras de Julio Abalde, reitor da Universidade da Coruña (UdC), é "o principal nexo de transferencia de coñecemento entre a universidade e o tecido empresarial”. Un dos alicerces de Feuga é a formación e os cursos cunha programación estábel "mais en continua evolución" e que "tenta dar resposta ás necesidades formativas e de cualificación do tecido empresarial e a comunidade universitaria e investigadora galegas". Curiosamente, e tal e como denunciaron profesionais, nesa oferta para alumnado universitario e investigadoras e investigadores galegos apenas existen á hora de impartir os cursos profesorado nin poñentes titulados ou licenciados do sistema universitario galego (SUG). "A mensaxe que entendo que se transmite é denigrante, como se non houber aquí persoas con capacidade para impartir esa formación", sinala en conversa con Nós Diario Santiago Martínez Suárez, licenciado en Dereito e consultor político. Unha opinión partillada tamén entre alumnado albo desta formación, como Raquel (prefire non dar o apelido): "É raro, porque hai cursos que podería impartir perfectamente alguén de aquí, pois hai profesionais moi bos e preparados mais aos que non se chama". "De fóra" En todo caso, non se pon en dúbida a calidade das e dos profesionais que imparten os cursos. “O que pretendo é deitar luz sobre unha política discriminatoria evidente e unha visión pailana por parte dos dirixentes desta entidade que, insisto, din ser a ponte entre as universidades galegas e as empresas”, apunta Martínez. Lembra que en 2017, nunha reunión cun responsábel da fundación, “dixéranme que non podía colaborar con eles porque non era de fóra”, pois os relatores de fóra da Galiza, sinaláronlle, tiñan maior poder de convocatoria. Naquela altura, sostén, expresou o malestar por esta ausencia de profesionais da Galiza a varios responsábeis, mais sen éxito. Tamén levara unha queixa ao Valedor da comunidade universitaria de Compostela. Xuventude en prácticas, a base precaria do sistema laboral Cero Na propia web de Feuga están dispoñíbeis os cursos e formacións que se impartiron ao longo do presente ano 2023. Son unha quincena de cursos, tanto presenciais como a través de videoconferencia, e cuxo prezo pode chegar a 350 euros. Hai relatores e relatoras que son docentes ou titulados en universidades como a UPV (Euskadi), as da Complutense, Carlos III e Politécnica de Madrid, a da Rioxa, a de Barcelona, a catalá Universitat Pompeu Fabra, a de Alcalá de Henares... mais non da Universidade de Santiago, da Universidade de Vigo ou da Universidade da Coruña, malia que as tres están en Feuga e a fundación ten Galiza como o seu ámbito de actuación e desenvolvemento. Cursos e formacións que abranguen cuestións tan diversas como o liderado híbrido, Excel avanzado, xestión eficiente das finanzas, o 'spin selling' e venda consultiva, a comunicación interna como ferramenta estratéxica, a elaboración de proxectos en I+D ou un taller práctico sobre revisión de modelos de bonificación. "Non hai nin un que vala para dar eses cursos? Nin un?", cuestiona Martínez. Esta situación non é exclusiva de 2023. Naquel ano 2017 dos últimos 30 cursos correspondentes ao último trimestre, entre os seus 27 poñentes só había un licenciado das tres universidades galegas. A Xunta retira o polémico borrador que cambiaba o modelo da universidade pública cara a un 'online' Universidade e Feuga A consultas deste medio, desde a USC apuntan que "no deseño da planificación da súa oferta docente, non poñemos en dúbida a capacidade de Feuga para elixir o profesorado ou persoas relatoras que considere máis apropiadas para o tratamento dos temas analizados nos cursos que promove". "Nesta discrecionalidade", proseguen, "entendemos igualmente que a escolla das persoas que imparten os seus cursos responden a uns criterios de calidade e competencia para tratar os temas propostos". Reivindicar a participación nos cursos de Feuga de profesorado universitario galego ou de persoas tituladas nas universidades galegas, indican, "entendémolo como unha forma lexítima de reivindicar o valor e a calidade dos nosos recursos humanos e dos profesionais formados nas institucións universitarias galegas. Entendémolo igualmente como unha medida que non é excluínte dunha programación apoiada en especialistas procedentes doutras universidades e en profesionais doutras comunidades". Pola súa parte, desde Feuga indicaron que "sempre procuramos introducir o maior número posíbel de docentes galegos en función da súa dispoñibilidade e circunstancias".