Nova xornada de incendios en Galiza
Un lume orixinado en Narón obrigou desaloxar varias casas dun lugar de Covas (Ferrol)
Máis unha nova xornada de incendios en Galiza, con lumes en diferentes puntos do país que afectaron a ducias de hectáreas. A seca de inverno e primavera engádeselle estes días os fortes ventos, unha combinación de alto risco. O incendio que se orixinara en Narón pasou na noite desta quinta a sexta feira ao concello de Ferrol, obrigando a decretar o Nivel 2 e desaloxar algunhas casas dun lugar da parroquia de Covas pola proximidade das lapas.Por volta de 400 hectáreas arderon neste lume, que continuaba activo na mañá desta sexta feira e contra o que se atarefaban 5 helicópteros, 15 brigadistas e 7 axentes, entre outros efectivos.
Non é o único incendio co que amence este 21 de abril. Continúa o de Oza-Cesuras, parroquia de Cis, que afecta unha superficie provisional de 30 hectáreas. E a Xunta informa que está controlado o de Vizoño (Abegondo), que queimou por volta de 46 hectáreas.
A Xunta declarou período de alto risco de incendios forestais mais, como denunciaron desde a CIG, “non se activa ao persoal propio da administración destinado a este período”. Embora catalogar a administración galega a situación como alto risco, os traballadores de reforzo para as tempadas de alto risco, pertencentes ao persoal propio do Servizo de Prevención e Defensa contra Incendios Forestais (SPDCIF) da Consellería do Medio Rural, "continúan sen seren contratados".