Nova suba de contaxios nas últimas 24 horas: 346 positivos máis
Máis 346 positivos confirmados por PCR na Galiza nas últimas 24 horas. Deles 81 rexistráronse na área sanitaria de Ourense, 68 na de Vigo e 60 na de Compostela.
Segundo os os datos actualizados na web da Consellaría de Sanidade, nas últimas 24 horas detectáronse 346 novos contaxios na Galiza. Distribúense da seguinte maneira: 81 na área sanitaria de Ourense; 68 na de Vigo; 60 na de Compostela; 57 na da Coruña; 31 na de Pontevedra; 30 na de Lugo e 19 na de Ferrol.
Tamén aumentaron os casos activos a respecto da quinta feira en 111 e sitúanse en 4.680, con incrementos en todas as áreas, excepto na de Pontevedra, onde caen.
En concreto, a de Ourense rexistra 1.601 -nove máis-; a da Coruña, 784 -14 máis-, a de Santiago, 660 -21 máis-; a de Vigo, 592 -58 máis-; a de Lugo ten 475 -oito máis-; a de Pontevedra, 401 -18 menos- e a de Ferrol rexistra 167 -19 máis-.
Até a data curáronse 22.788 persoas, o que supón 238 máis que as contabilizadas na quinta feira. E realizáronse 572.690 PCR fronte ás 566.061 contabilizadas até onte.
Galiza rexistrou até a data o falecemento de 808 persoas con Covid-19.
Aumentan as hospitalizacións
En relación ás persoas hospitalizadas, segundo o Sergas, 231 mantéñense en planta (8 máis que hai 24 horas) e 41 (un menos que hai 24 horas) en Unidades de Coidados Intensivos.
Segundo a información actualizada na web da Consellería de Sanidade na mañá da sexta feira con datos recollidos até as 18 horas da quinta feira, na área sanitaria de Ourense, Verín e O Barco soben a 105 os pacientes con Covid-19 ingresados, deles 13 en UCI.
Na área da Coruña e Cee mantéñense en 47 os pacientes con Covid hospitalizados, deles 43 en planta e catro en Unidade de Coidados Intensivos. Mentres, na área de Santiago e Barbanza os pacientes con Covid-19 ingresados soben a 43, deles oito en unidade de críticos.
Na área de Vigo increméntanse a 34 os pacientes con Covid-19 hospitalizados, deles nove permanecen en UCI e 25 noutras unidades de hospitalización.
Pola súa banda, na área de Lugo, A Mariña e Monforte as persoas con coronavirus ingresadas descenden a 24, delas cinco en UCI -1 menos- e 19 noutras unidades de hospitalización -cinco menos-.
Na área de Pontevedra e O Salnés baixan a 16 as persoas ingresadas con Covid, delas 14 en planta e dúas en UCI. E na área de Ferrol os hospitalizados con Covid descenden a tres -un menos-, ningún deles en unidade de críticos.
No día de hoxe, o Sergas incorporou Ordes á lista de once municipios galegos en alerta vermella pola incidencia da Covid-19 nos últimos sete días.