Nova condena á Xunta por vulnerar o dereito de greve o 8M, desta volta no 061

A Xunta volve ser condenada por vulnerar o dereito á greve das mulleres no marco do paro feminista do 8M. Desta volta, a condena é concreta sobre os servizos mínimos de 100% declarados para as traballadoras locutoras e teleoperadoras do 061.

A Xunta vulnerou o dereito á greve feminista do 8 de marzo ás teleoperadoras e locutoras do 061 ao establecer uns servizos mínimos do 100%, declarados “abusivos” segundo a sentenza emitida este xoves polo Tribunal Superior de Xustiza de Galicia (TSXG). Uns feitos denunciados pola Central Unitaria de Traballadoras. As locutoras e teleoperadoras do 061 viron como, constituíndo as mulleres unha maioría ampla no servizo, e polo tanto cun importante poder de incidencia no paro do 8M, recibiron uns servizos mínimos do 100%.