Nais e pais do Frei Luís de Sarria advirten das "fendas" dos ximnasios
Reclaman unha actuación "a fondo".
A "maioría" dos nenos e nenas retomaron as clases no colexio Frei Luís de Granada de Sarria. A pesar diso, nais e pais aínda non están convencidos das actuacións realizadas no centro e reclaman unha reforma "a fondo" para solucionar as deficiencias que presentan tanto as aulas como os ximnasios nos que se imparte educación física.
A situación do inmoble levou as familias a non mandar aos seus fillos e fillas a aulas desde o 20 de xaneiro, debido ás obras de apuntalamento que se realizan no centro e a súa preocupación polo perigo para os pequenos e pequenas.
A Consellería de Educación, Universidade e Formación Profesional decidiu habilitar aulas provisionais na Escola Fogar de Sarria para recolocar aos alumnos do CEIP e esta segunda feira regresaron a clase 256 crianzas.
Javier Pico, un dos proxenitores, destacou que "a maioría" dos nenos e nenas retomaron a actividade e que as aulas dispostas por Educación "son aceptábeis, aínda que con tamaños diversos". "Hai aulas que son moi grandes, pero tamén hai aulas que son moi pequeniñas, cun espazo mínimo. ", lamentou.
Doutra banda, os pais trasladaron a súa preocupación polo estado dos ximnasios que se atopan na zona afectada polas obras, un lugar que" xa en 2011 apareceu con fendas e agora vólvense a reproducir".
"Os forxados que están encima dos ximnasios están con defectos aínda que a Consellería (de Educación) di que os ximnasios son seguros os pais temos serias dúbidas polos forxados". É por iso que unha porcentaxe elevada de pais solicitaron "que non se impartan clases" neste emprazamento e que as aulas de educación física trasládense "a outras zonas seguras do edificio".