Os nacementos descenden na Galiza máis dun 10% no primeiro trimestre

Galiza rexistra un total de 3.422 nacementos no primeiro trimestre de 2021, o que supón 410 menos (-10,7%) que no mesmo período de 2020. Así figura nunha estimación experimental de nacementos que publica esta quinta feira o Instituto Nacional de Estatística (INE) coa fin de coñecer os ocorridos desde xullo de 2020 (os datos do primeiro semestre xa se atopan publicados con carácter provisional).

O INE aborda este proxecto con datos actualizados recibidos cada mes desde os rexistros civís combinados con información histórica da Estatística de Nacementos. O obxectivo é estimar os nacementos que tiveron lugar durante a Covid-19.

Ao peche de 2019 só cinco concellos galegos rexistraban un saldo vexetativo positivo

A nivel estatal, estímase que houbo 77.794 nacementos no primeiro trimestre de 2021, o que representa unha caída do 8,75%, dous puntos menos que o caso galego.

Se a comparativa se realiza cos primeiros tres meses de 2019, tamén hai unha caída de nacementos na Galiza (-11,5), algo superior á media no estado nese mesmo período (-11,1%).

Galiza rexistrou en 2020 un saldo vexetativo negativo en 5.193 persoas nos primeiros tres meses dese ano. Deste modo, producíronse 3.820 nacementos -1.929 nenos e 1.891 nenas- fronte a 9.013 mortes -4.374 homes e 4.639 mulleres-.

De feito, ao peche de 2019 só cinco concellos galegos rexistraban un saldo vexetativo positivo: Ames (+72), O Porriño (+41), Salceda de Caselas (+29), Arteixo (+17), Ribadumia (+2).