Nace unha rede de plataformas ambientais na bisbarra de Compostela

Plataformas sociais e veciñais da bisbarra de Compostela e dos tramos finais dos ríos Ulla e Tambre veñen de xuntar forzas nunha rede de acción. O manifesto Esiximos respecto é o primeiro acto público conxunto, e presentárono esta segunda feira, 22 de outubro, en Compostela.
 

“Somos territorios a día de hoxe gravemente agredidos ambiental, social, sanitaria e economicamente”, comeza o texto, “e a poboación afectada, repartida en 51 concellos, supera os 400.000 habitantes”.

 

Os integrantes da rede denuncia “a falta de sentido de país” como a causa orixinal dos problemas deste ámbito xeográfico. “Nula planificación do territorio, rapina predadora de empresas foráneas sobre os recursos naturais, empobrecemento económico, perda de poboación rural, aumento da contaminación ambiental, danos na saúde”, sinalan.

 

A rede critica a “laxitude” da lexislación, e coloca o exemplo da contestadísima Lei de fomento e implantación de iniciativas empresariais de Galiza, “que desprotexeu a poboación en materia de minas, montes ou enerxía eólica, e reduciu os prazos de resposta dos afectados para a defensa dos seus intereses, e facilitou os trámites das empresas”.

 

O proxecto da mina de Touro, a falta de depuración de augas urbanas no río Sar, o vertedoiro de Lesta en Ordes ou, no mesmo concello, a repotenciación da subesteación de Mesón, a destilaría de Rois ou a solicitude para unha planta de tratamento de Residuos en Casalonga (Teo) son algúns dos conflitos ambientais mencionados no manifesto.

 

“Por todo isto pedimos que se reforme o corpo lexislativo relativo ás autorizacións ambientais e á ordenación do territorio, que se cumpra coa lexislación en autorizacións e seguimento das actividades autorizadas, e que non se poñan trabas artificiais e mesmo ilegais aos cidadás que denuncian abusos”, conclúe o documento, “esiximos responsabilidade e, por riba de todo, esiximos respecto”.