As mulleres do cerco toman posicións para levantar o campamento
As mulleres volven ao campamento de San Caetano. Non o fan para tomar o relevo dos homes. Fano, desta vez, para darlle a fin ás máis dun cento tendas de campaña que simbolizaron durante tres meses a loita do cerco.
A partir das 21h deste sábado espérase a chegada das mulleres do cerco ao campamento de San Caetano, onde terá lugar a “derradeira cea” e o esconxuro da queimada, que formarán parte dos actos de feche deste campamento reivindicativo que se erixiu durante tres mes aos pés do edificio administrativo da Xunta de Galiza.
Concluída a cea, as mulleres, que portarán fachos, sairán nunha procesión simbólica cara a capela do Carme, onde reivindicarán que viven do mar”.
Xa na xornada do domingo terá lugar o acto de levantamento das tendas de campaña, no que participarán todos os representantes do sector, convocados pola Acerga.
As mulleres do cerco sinalan que continuarán a loita para informar e concienciar o pobo galego da problemática que atravesa a frota cerqueira. Para isto, desenvolverán unha xeira de actos informativos e reivindicativos en distintos puntos do país durante os próximos meses.
Volta ao mar
Esta segunda feira, 25 de xaneiro, os barcos do cerco voltarán ao mar. Mais fano coa reivindicación de restituír o anterior sistema de reparto de cotas lineal, é dicir, en función do número de tripulantes, no canto do sistema de capturas en base aos históricos.
Acerga, que recoñece un incremento das capturas nun 17% respecto de 2015, denuncia o trato a favor da Consellaría do Mar aos 20 barcos que forman parte da asociación minoritaria Cerqueiros Galegos. Este colectivo defende un reparto en función das capturas históricas, o que vai en detrimento do resto da frota galega do cerco.