O Movemento Global a Gaza convoca mobilizacións por mar e terra para apoiar a 'Global Sumud Flotilla'
O Movemento Global a Gaza – Galiza convoca mobilizacións en todo o país este sábado, 30 de agosto. As accións, que decorrerán baixo o lema "Contra o xenocidio e en apoio á Flotilla Sumud Global", terán lugar en cidades e vilas galegas como Compostela, Vigo, Ferrol, A Coruña, Ourense, Pontevedra, Fisterra, a Illa de Arousa, Sanxenxo ou Redondela.
O Movemento Global a Gaza – Galiza chama á sociedade galega a mobilizarse en solidariedade co pobo palestino e en apoio á Flotilla Sumud Global, que partirá o 31 de agosto desde distintos portos internacionais para "romper o bloqueo imposto polo Estado de Israel a Gaza". Están organizadas accións por mar e por terra.
As accións confirmadas na Galiza son as seguintes:
- Compostela: Concentración ás 12 horas na praza do Toural.
- A Coruña: Manifestación ás 12 horas desde o Obelisco.
- Ourense: Concentración ás 20 horas na praza Maior.
- Pontevedra: Roteiro ás 20 horas desde o Hospital até a Subdelegación.
- Lugo: Concentración ás 20 horas na praza Maior.
- Ferrol: Encontro de embarcacións ás 12 horas no peirao de Cortina. Ás 20 horas, recital poético no peirao de Curuxeiras.
- Vigo: Regata de vela solidaria ás 11 horas e marcha terrestre en Samil ás 17 horas.
- Fisterra: Marcha ás 11 horas desde o Monumento ao Emigrante até o faro.
- Illa de Arousa: Marcha pola ponte e flotilla ás 12 horas.
- Sanxenxo: Marcha desde a praza dos Barcos á Lonxa de Portonovo ás 19 horas.
- A Guarda: Concentración ás 19 horas na praia do Porto.
- Ribadeo: Concentración, o domingo ás 12.30 horas, na praza de España.
- Redondela: Concentración o 1 de setembro ás 20.30 horas na praza do Concello.
Denuncia e solidariedade
Desde o movemento denuncian que a comunidade internacional está a asistir "en directo a un xenocidio"., con "vidas esnaquizadas, familias destruídas, hospitais e escolas bombardeadas, persoal sanitario e xornalistas asasinados".
Critican tamén a complicidade de gobernos europeos e institucións internacionais, "que manteñen relacións comerciais e militares co Estado de Israel mentres a infancia palestina é obxectivo do terror".
A Flotilla Sumud Global estará composta por ducias de barcos con tripulacións de 44 países, que partirán o 31 de agosto co obxectivo común de romper o "asedio ilegal imposto a Gaza" por mar e entregar axuda humanitaria. Ademais, este movemento global pretende facer visíbel a solidariedade internacionalista con Palestina.
"Palestina resiste xeración tras xeración, con dignidade e orgullo, e a súa loita é tamén a nosa. O 30 de agosto, Galiza sairá á rúa para dicir que Palestina non está soa", sinalan desde a organización convocante.
O Movemento Global a Gaza – Galiza pide a todas as organizacións sociais, sindicais, culturais, feministas, estudantís, ecoloxistas, veciñais e políticas e ao conxunto da sociedade galega, que se sumen á mobilización, e fai un chamamento especial a manter a vixilancia no caso de que a flotilla sufra "sabotaxes ou ataques durante a súa viaxe".