O movemento feminista defende o aborto "accesíbel para todas" co gallo do 28-S
Após a entrada en vigor da reforma lexislativa que obriga as menores de idade a contar con autorización familiar para interromper un embarazo non desexado, o movemento feminista conmemora o Día de acción global por este dereito.
Desde o 21 de setembro de 2015 as mulleres de entre 16 e 18 anos están obrigadas a contar con autorización famliar para interromperen a súa gravidez. Así o aprobou o poder lexislativo español cos votos favorábeis unicamente do Partido Popular e deputad@s de Unió e Foro Asturias. E así o recolle o Boletín Oficial do Estado.
Neste senso, é preciso que "para a interrupción voluntaria do embarazo de menores de idade ou persoas con capacidade modificada legalmente será preciso, para alén da súa manifestación de vontade, o consentimento expreso dos seus representantes legais".
Este 28 de setembro, Día de acción gobal polo dereito ao aborto, o movemento feminista da Galiza sae de novo ás rúas para conmemorar a data e reivindicar o acceso a unha interrupción voluntaria do embarazo "legal", "seguro" e "accesíbel para todas", coa ollada posta nesta reforma lexislativa.
Con motivo da xornada foron convocadas concentracións nas sete cidades galegas ás 20 horas.
- Vigo: Farola de Urzáiz
- Compostela: Praza 8 de marzo
- Pontevedra: Pazo da Cultura
- A Coruña: Teatro Rosalía de Castro
- Lugo: Praza do Concello
- Ourense: A Castañeira. Subdelegación do Goberno
- Ferrol: Praza do Concello