Achan falecido un home na súa vivenda, na que había fume, no Barco de Valdeorras

Unha muller atopou falecido un home no salón da súa casa, na que había fume, situada no municipio do Barco de Valdeorras. Segundo informa o 112-Galiza, a central de emerxencias recibiu a alerta contra as 13 horas do mediodía desta segunda feira a través de Urxencias Sanitarias da Galiza-061.

Tal e como indicaron desde o servizo de Urxencias, a coidadora do home achou o seu corpo sen signos vitais no salón da vivenda, situada na rúa de Rubia, no municipio do Barco.

Aliás, a muller deu conta dunhas cadeiras calcinadas, se ben matizou que, cando chegou ao lugar, xa non ardía nada dentro do domicilio en cuestión.

Así, tras recibir o aviso, o 112 solicitou a intervención do GES de Valdeorras, da Policía Local e da Garda Civil, que se desprazou até o lugar. As autoridades tratan agora de esclarecer as circunstancias deste tráxico suceso.