Mentiras e voto responsable

Unha mentira é como unha bola de neve; canto máis roda [Rueda], máis grande se volve. Martin Lutero (1483-1546, reformador alemán). O 4 de febreiro de 2024 a Plataforma SOS Sanidade Pública de Galicia convocou a cidadanía de Galicia a saír á rúa e dicirlle ao PP o que pensamos da sanidade real que temos no país e non a que nos queren vender dende os seus medios de comunicación e especialmente os de titularidade pública. O éxito da manifestación foi potente e o Obradoiro quedou pequeno para recibir a xente que manifestou o seu rexeitamento á forma de administrar o ben máis prezado que temos que é a nosa saúde. Xente de todo o país e de todas as ideoloxías (e moita votante do PP) díxolle alto e claro que o desmantelamento e a privatización do sistema público non é a solución. As mentiras permanentes que nos contan: "A culpa é de Madrid", "a valoración da sanidade na Galiza é moi alta", "non temos médicos", "non faltan pediatras", "non se desmantelou ningún consultorio", "o MIR é escaso para o que necesitamos", etc. son desculpas de mal pagador e de alguén que non ten a conciencia tranquila e bótalle as culpas a calquera, con tal de non se faceren responsables dos seus propios actos. Non hai persoal médico? "Non temos médicos": o MIR deste ano é o máis numeroso en prazas da historia da formación regrada para exercer. Para que concedan un número determinado de prazas, deben solicitalas as CCAA, segundo a súa capacidade de dar a formación. Se lle dan as que lle dan, son as que solicitou. Se non lle dan máis é porque non ten capacidade de formar máis médicos. Se se presentan para Galiza 621 médicos e médicas e se ofertan 207 prazas, o propio sistema deixa fóra 414 profesionais que poderían optar a unha praza. Como que non hai médicos? É mais, as transferencias tenas Galicia dende o minuto un, pode convocar as prazas que lle fan falta, como fixo no 2022, que ofertou 176 e presentáronse 350, co que deixou fóra 174; pero no ano 2023, ofertou 76 e presentáronse 250, co que deixou fóra 174; insisto, como que non temos médicos? É a culpa de Madrid? Por suposto que non. Os orzamentos da Galiza teñen que recoller os cartos que fan falta para convocar as prazas que fan falta, de médico, enfermaría, traballo social, etc., así como as categorías que non están nos centros de saúde, como psicólogos clínicos, fisioterapeutas, terapeutas ocupacionais, logopedas, etc. Unha atención integral supón ter todos estes profesionais nos centros de saúde, cousa que non fai o PP. Cando se pregunta á cidadanía que opina do sistema sanitario, que nota lle poría, sempre abeira o 7, pero non é grazas aos administradores (que por isto non se pregunta nunca, por que será?); é grazas ao esforzo sobrehumano que fan as persoas que traballan día a día no sistema de saúde. Pola saúde colectiva Din que "non se desmantelou ningún consultorio". Non só iso: camas nos hospitais, centros de saúde, prazas de médicos xubilados, cotas de profesionais nos centros de saúde... Xa digo, menten máis que falan! Din que "non faltan pediatras": máis da metade dos concellos da Galiza están actualmente sen pediatra. Non hai máis preguntas señoría! Din que o "orzamento para sanidade aumentou en 1.000 millóns de euros dende o 2008". Como todo: é radicalmente falso, pois se sumamos o IPC dende ese ano, deben investir este ano 181 millóns de euros máis; e tivemos unha pandemia e unha crise económica permanente pola excesiva subida dos prezos ano a ano. Como argumento de descualificación da manifestación, di Rueda que "a manifestación é política". Como se isto fose un insulto para as convocantes. A estratexia para desmantelar e privatizar a sanidade por parte do PP si que é política Só dicirlle ao presidente que a estratexia galega de desmantelamento e privatización por parte do PP si que é política, da que moitos dos actuais administradores levan máis de 20 anos vivindo. E o financiamento da plataforma depende das entidades que a compoñen. Sr. Rueda, Sr. Comesaña: vostedes forman parte do PP, condenado dúas veces por corrupción, o partido máis corrupto de Europa. E non falemos do financiamento que fan aos medios de comunicación (e sobre todo aos públicos) porque iso, cando se investigue, tamén será para condenalos, se non a nivel xudicial, si nas urnas. O PP segue instalado na non aceptación do problema e se non cambia a tendencia, a sanidade na Galiza será desmantelada e para moita xente será xa irreversible! Votaremos o 18 de febreiro coa intención de reverter o problema sanitario actual e devolver á cidadanía a nosa saúde! De nós depende.