Libre circulación ás portas da terceira onda da pandemia

A evolución epidemiolóxica da Galiza é mala, apuntan os expertos sanitarios consultados por Nós Diario. De feito, presaxian un empeoramento da situación máis acusado do que reflicten, de momento, os datos diarios facilitados pola Consellaría de Sanidade. En poucos días, advirten, comezarán a observarse as consecuencias dos encontros sociais que tiveron lugar durante este Nadal. Uns efectos que xa se reflicten no número de novos contaxios detectados, no incremento da porcentaxe de PCR positivas e na suba da presión hospitalaria. "Dende o 18 de decembro xa se distingue un novo cambio de tendencia, que se advirte, primeiro, nos tests diagnósticos realizados", comenta Ignacio Ramil, especialista en Medicina Interna no Complexo Hospitalario Universitario da Coruña (Chuac). "Se consideramos a evolución da pandemia durante a última semana, a que vai do 27 de decembro ao 3 de xaneiro, a incidencia na nosa área sanitaria -A Coruña e Cee- duplicouse, pasando de 380 casos a 740 cun incremento engadido da taxa de positividade dun 9%". Dous meses negros Este percorrido, destaca, "augura que durante esta semana e a que vén seguiremos crecendo, e moito; até o punto de finalizar esta semana con máis dun millar de novos casos positivos diagnosticados", detalla Ramil. Neste sentido, apunta os 92 novos casos detectados comunicados polo Sergas no inicio da semana na área da Coruña e Cee, "cunha porcentaxe de PCR positivas de 15%, unha taxa moi alta, que en termos de hospitalización, no momento no que estamos, fai prever dous meses moi negros, cunha gran sobrecarga asistencial e probabelmente co feche de varias plantas para poder atender as persoas enfermas con Covid-19". As festas de Nadal xeraron unha situación esperada, e estamos vendo as consecuencias, coas que teremos que lidar, polo menos, os próximos dous meses Ignacio Ramil estima que poden chegar a duplicar a cifra de hospitalizacións actual -98- se non se aplican as medidas necesarias para frear a expansión do novo coronavirus. "A situación de infección na rúa está mal e xa é coñecida desde a semana pasada. Polo tanto, se se quere conter o seu crecemento téñense que tomar medidas sen esperar máis", salienta sen entrar a cuestionar a libre mobilidade acordada polo Goberno da Xunta para esta xornada festiva de Reis. "Creo máis claro non se pode dicir. Cos índices de control da pandemia disparados, como é o caso da taxa de positividade e da razón de taxas, as medidas teñen que ser acordes a como está crecendo a incidencia", incide Ramil, unha mensaxe que dirixe tanto á cidadanía como ás autoridades. "As festas de Nadal xeraron unha situación esperada, e estamos vendo as consecuencias, coas que teremos que lidar, polo menos, os próximos dous meses". Soben os casos Covid Segundo o último balance facilitado polo Sergas, a área sanitaria da Coruña rexistrou 71 novos positivos nas últimas 24 horas mediante probas PCR, unha cifra que se eleva até os 87 se se teñen en conta outros métodos de diagnóstico da infección activa, e que fai subir a taxa de positividade diaria até perto de 18%. A canda a área da Coruña, lideran o incremento de novos casos as de Santiago e Ourense. Os datos sobre a evolución do coronavirus reflicten un aumento das infeccións activas e da presión hospitalaria No conxunto do territorio, o número de novos casos detectados diminuíu a respecto do día anterior. Foron 352, 298 dos cales se detectaron a través de PCR, noutra xornada con poucas probas realizadas, 4.209. Porén, os datos sobre a evolución do coronavirus reflicten un aumento das infeccións activas e da presión hospitalaria, así como da taxa de positividade global, que se sitúa en 7,3%, o dobre da rexistrada o 23 de decembro, de 3,8%. Ocupación hospitalaria A presión hospitalaria aumentou nas últimas horas. Xa son 398 as persoas ingresadas, 10 máis que o día anterior, das cales, 56 están en Unidades de Coidados Intensivos, que tamén incrementaron a súa ocupación, con dúas novas doentes. Por áreas sanitarias, A Coruña e Cee asume a maior carga asistencial con 98 pacientes ingresadas, seguida de Santiago e A Barbanza, con 93; Vigo, con 61; Ferrol, con 51; Pontevedra e O Salnés, con 48; Ourense, Verín e Valdeorras, con 30 hospitalizados, e Lugo, A Mariña e Monforte con 17 pacientes Covid. A situación empeorou sobre todo no caso de Santiago e Ferrol, con sete e seis novos ingresos respectivamente. Estas dúas cidades, son a canda A Coruña, as que experimentaron un maior incremento no número de casos activos que, de novo, abeira os 6.000. O Sergas comunicou 86 máis que o último día, en total, 5.991. Á cabeza segue a área de Santiago e A Barbanza con 1.336 infeccións activas, nove máis que hai 24 horas. A Coruña e Cee conta 1.224, 31 máis. E a continuación, Vigo, onde diminuíron as infeccións activas en 21 até as 1.113. Por detrás destas, Pontevedra, con 20 casos mais, 751 en total. Ourense sumou, 18 e computa 688. A área de Lugo engadiu 24 casos máis, até os 531, e Ferrol, cinco, até os 348. No punto de mira A Coruña e Santiago son as cidades con peor evolución e con datos máis negativos. Están no punto de mira de Sanidade, que esta sexta feira volverá reunir o Comité Clínico para avaliar a situación e actualizar as medidas de restrición vixentes na Galiza. Tras a xuntanza que tivo lugar a pasada segunda feira, 4 de xaneiro, apenas se produciron cambios. O comité de expertos acordou manter os límites actuais para a maioría de municipios, e variou unicamente as condicións para a veciñanza de Carnota e As Pontes, que xa gozan do nivel básico de restricións, e de Narón, que pasou ao nivel medio. Doutra banda, en sintonía coa preocupación expresada pola evolución da pandemia nas comarcas da Coruña e Santiago, o Comité Clínico ampliou a lista de concellos en vixilancia especial. Así, incorporou a ese listado A Coruña, Abegondo, Bergondo, Arteixo, Cambre, Carral, Culleredo, Oleiros e Sada, ademais de Santiago, Ames, Teo, Brión, Boqueixón, Vedra e Val do Dubra. O Comité Clínico prevé medidas mási duras para as comarcas da Coruña e Santiago ante a evolución da pandemia "O que está pasando agora e o que pasará nas próximas semanas era previsíbel despois das medidas que non se tomaron, das reunións familiares de Nadal, dos encontros nos bares e nos centros comerciais", asegura Luís Vázquez, especialista en Análises Clínicas. "O normal é que os contaxios sigan crecendo, por iso, desde o punto de vista sanitario, é ilóxico que en vez de cortar xa polo san consintan volver a entrar e saír este día de Reis" sempre que sexa para visitar a parentela. Unha decisión "ilóxica" Malia o empeoramento paulatino da situación, desde as 6 até as 23 horas desta cuarta feira a Xunta acordou permitir a libre mobilidade da cidadanía en todos os concellos da Galiza. "O plan de vacinación está en marcha, pero os seus efectos non se van ver antes do verán". Os resultados non serán inmediatos, incide Vázquez, quen destaca a importancia de garantir a inoculación da poboación, especialmente da das persoas maiores, na súa fase inicial. "Desta maneira conseguiremos reducir a letalidade, rebaixar o número de mortes. Só a área da Coruña rexistrou seis falecementos por Covid-19 no inicio da semana", salienta a Nós Diario, o que demostra a necesidade de medidas que contribúan a frear a propagación do virus. "O frío convídanos a estar a lugares fechados, que aumentan o risco de transmisión. E non debemos esquecer a aparición da nova cepa do coronavirus, máis contaxiosa, que apunta, tamén cara a un aumento dos casos". Á espera de medidas máis duras, tras o Nadal, o Goberno galego decidiu manter até o día 11 o feche perimetral da Galiza.