Un dos letrados da acusación contra os militantes do BNG foi xulgado por participar nun ataque ultradereitista
Ex militante da organización xuvenil de Fuerza Nova, Santiago Milans del Bosch viuse envolvido en episodios de violencia contra persoas de esquerda durante a súa mocidade. Nos anos 80 chegou a ser xulgado pola súa implicación no asalto a un bar -El Largo Adiós- de Valladolid, nunha acción que se saldou cun ferido de bala. Acaba de asumir tamén a defensa do ex ministro e ex presidente da Generalitat valenciá, Eduardo Zaplana.
Santiago Milans del Bosch (Madrid, 1960) é un dous letrados -o outro é o avogado colexiado en León Ignacio de la Huerga Varela- da acusación contra os 19 militantes nacionalistas galegos que protagonizaron unha acción simbólica no Pazo de Meirás en agosto de 2017. Os familiares do ditador e a Fundación Francisco Franco atribúenlles a comisión de 4 delitos, e pídenlles penas que sumarían até 247 anos de prisión e multas por un valor estimado de medio millón de euros.
Antes de abrir un bufete como avogado, Milans del Bosch foi xuíz e, imediatamente antes de o ser, viuse envolvido en accións violentas da ultradereita contra activistas da esquerda. Sobriño dun dos cabecillas do golpe de estado de 1981, foi xulgado pola súa participación no asalto a un bar de Valladolid -"El Largo Adiós"- propiedade dun esquerdista local. O ataque produciuse a 6 de xaneiro de 1981, nas vésperas do golpe de estado coprotagonizado polo seu tío, o capitán xeneral Jaime Milans del Bosch. Houbo disparos de bala contra a clientela de "El Largo Adiós" e foi ferido de gravidade con dous impactos Jorge Simón Escribano, que ficou con secuelas de por vida.
Milans del Bosch -no momento do asalto tiña 21 anos- foi finalmente absolvido -a 11 de outubro de 1985- após ser acusado de tenza ilícita de armas porque a Audiencia Nacional estimou que a súa colaboración na preparación do atentado -el en ningún momento estivo presente na escena do tiroteo- foi exclusivamente movida por "sentimentos de fraternidade cara ao seu irmán Alfonso, polo que hai motivos para o excluír de responsabilidade".
O sobriño do golpista non era un perfeito descoñecido para a policía: precedíano os seus antecedentes "por agresións de palabra e obra a persoas doutra ideoloxía política, así como por alteracións da orde pública", segundo se consignaba na súa sentenza absolutoria.
A querela contra os 19 militantes do BNG
En declaracións de testemuñas realizadas perante a Garda Civil en decembro de 2017, Milans del Bosch comparece como letrado da acusación -familiares do ditador e a Fundación Francisco Franco- na compaña de Ignacio de la Huerga Varela. Porén, o texto da querela contra os 19 militantes do BNG -rexistada perante o xulgado de Betanzos a 9 de outubro de 2017- vén asinado só por De la Huerga Varela e polo procurador Domingo Rodríguez Siaba.
Recentemente, a figura de Santiago Milans del Bosch voltou a cobrar actualidade ao aceitar a defensa do ex ministro e ex presidente da Generalitat valenciá Eduardo Zaplana, quen enfrenta cargos por branqueamento de capitais e suborno.