Os incendios que permanecen activos na Galiza arrasaron xa 265 hectáreas
Os tres incendios que permanecen aínda sen controlar na Galiza queimaron xa 265 hectáreas en conxunto. Os lumes afectan os concellos de Oímbra (140 hectáreas), Melón (75 hectáreas) e Cenlle (50 hectáreas).
Nos tres casos a superficie arrasada viuse ampliada ao longo desta mañá. A pesar de que a Xunta dá por estabilizado, pero non controlado, o incendio de Oímbra, na parroquia de Bousés, as hectáreas calcinadas duplicáronse en poucas horas, pois pasaron de 70 a 140 hectáreas entre os informes da Consellaría de Medio Rural das 8 e das 13,30 horas desta terza feira. Este incendio entrou desde Portugal.
Pola súa parte, o incendio no concello de Melón, que está a afectar especialmente a parroquia de Quins, non deixa de crecer. Tras iniciarse na noite da segunda feira, arrasou xa unhas 70 hectáreas, segundo a última estimación provisional. Esta cifra supón 50 hectáreas máis que á primeira hora deste hoxe.
"Que clase de incendio aparece ás 22.30 horas e perto dun pobo sen ser malintencionado?", preguntábase o rexedor de Melón, Emilio Díaz, en declaracións a Europa Press. O alcalde quixo resaltar que, polo de agora, "practicamente non hai" perigo para ningunha aldea, xa que a máis próxima é a de Vilaverde, separada das chamas “por unha autovía”.
No caso de Melón, é o terceiro incendio que se declara no que vai de verán. O rexedor explicou que se actuou tarde nos labores de control do lume “porque cando empezou arder en Melón tanto a nosa brigada como o noso camión atopábase colaborando na extinción do incendio de Cenlle. Non é fácil explicarlle aos veciños que non podemos mandar o camión porque xa está noutro incendio", recoñeceu Díaz.
Reactivación en Cenlle
No incendio de Cenlle, que afecta a parroquia da Pena, o lume calcinou xa 50 hectáreas, unhas 10 hectáreas máis que unhas horas antes. A pesar de que o último informe da Consellaría de Medio Rural apunta que "evoluciona favorabelmente cara á súa estabilización", segue activo e sen control. O alcalde de Cenlle, José Manuel Rodríguez, explicou que así era até o mediodía, pero que o vento cambiou de dirección e "reactivou dúas dos focos".
"Á primeira hora da mañá estaba máis ou menos controlado. De feito quedaba un pequeno foco que, desde o descoñecemento, simplemente véndoo, parecía que se ía a extinguir, pero agora a situación é outra. A ver como progresa ao longo do día, de momento estamos tranquilos porque, aínda que se produciu no pobo de Cuñas, as casas están aínda afastadas", concluíu.