A guerra fría ao redor da primeira universidade privada
Cando a Xunta recibiu a solicitude por parte de Afundación para o recoñecemento da nova Universidad Internacional de la Empresa –UIE–, Juan Carlos Escotet, presidente de Abanca, premeu a espoleta para o inicio das hostilidades entre o seu proxecto e o que paralelamente desenvolve Venancio Salcines co Centro de Estudios Superiores Universitarios de Galicia –Cesuga–.
Esta contenda non dará lugar a ningún enfrontamento directo entre ambos os dous bandos, mais deixará varios caídos e obrigará todas as partes involucradas a se posicionaren, algo que xa está a suceder. Escotet, sabedor de que quen golpea primeiro golpea dúas veces, gañou o apoio pouco disimulado da administración galega, como veñen confirmando coas súas declaracións a conselleira de Educación e o secretario xeral de Universidades.
Ademais da súa proximidade con Feixoo, conta con outras bazas ao seu favor, como o músculo financeiro de Abanca ou a idea de repartir café para todos, situando o reitorado da nova universidade en Compostela e contando con campus na Coruña, Pontevedra e Vigo, estando nesta a sede principal. Precisamente este último punto foi unha das claves para que dentro do PP se rompese a imaxe monolítica que sempre intenta transmitir e se conformasen dúas faccións, segundo confirman fontes internas. Por un lado está a do sur da Galiza, próxima ao plan de Escotet, e por outro, a do norte, que non ve a xogada do presidente de Abanca como propia, ao contrario do que sucede coa promovida por Cesuga e Salcines.
O Cesuga ten case 25 anos de existencia e na actualidade opera como centro adscrito á Universidad San Jorge de Zaragoza –unha das peores do Estado segundo un estudo da Fundación BBVA–, o que lle permite expedir títulos oficiais de grao en Administración e Dirección de Empresas –ADE–, Arquitectura, Tradución e Comunicación, Publicidade e Relacións Públicas. Este é o xermolo sobre o que Venancio Salcines, antigo profesor da UDC e presidente da Escola de Finanzas Business School de Oleiros –competencia directa do actual Ieside Business Institute de Abanca–, pretende construír a medio prazo unha “universidade privada de referencia” na Coruña, con personalidade xurídica propia e sen depender dun terceiro actor. Para logralo o Cesuga realizou en xullo unha ampliación de capital, dando entrada no seu accionariado varios dos empresarios máis importantes da zona, encabezados por Ignacio Rivera, de Hijos de Rivera; o ex presidente do Deportivo Tino Fernández, de Altia; Francisco Cernadas, da construtora Incoga; ou Manuel Pose, de Alumán.
A maiores, fontes próximas a este proxecto confirman que se agarda que Concello e Deputación da Coruña –encabezadas polo PSOE– “non poñan moitos obstáculos” ás ambicións de Salcines, un home conservador pero con boa relación cos socialistas, como demostra o feito de ter sido concelleiro de Facenda para o histórico Antonio Varela Saavedra en Cambre unha década atrás.
[Podes ler a reportaxe íntegra no número 365 do semanario en papel Sermos Galiza, á venda na loxa e nos quiosques]