Gozar limpando o planeta

Hai preto de dous anos naceu o movemento Coidemos Lugo e neste tempo descubrín un pracer compartido -polo que leo desde que estamos nisto- cada vez por máis persoas no mundo: recoller lixo, limpar o planeta, coidar do patrimonio. Máis alá do reivindicativo e educativo de colectar o que outros tiran, experimentei e experimento desde ese agosto de 2020 unha sensación de pracer que constato é compartida coas miñas compañeiras e compañeiros, e por moitísimos outros movementos ambientais e de protección do patrimonio: exercer accións positivas como estas engancha e convértese nun modo marabilloso de coñecer lugares da nosa xeografía, facer amigos, e construír xuntos unha realidade mellor. Un profesor da miña etapa de máster en Compostela, Jacobo Feás, que xa veu a varias accións de Coidemos Lugo, envioume hai uns meses un par de artigos que me deixaron encantado: coñecedes o plogging? Do sueco plocka upp (recoller) e do inglés jogging (trotar) naceu en Suecia unha actividade que combina o deporte co coidado do medio ambiente. Erik Ahlström deixou o seu pobo para mudarse a Estocolmo, e en 2016 comezou a recoller o lixo que vía cando ía correr. Grazas sobre todo ás redes sociais viralizou a súa nova afección e pouco a pouco converteuse nunha tendencia primeiro en Suecia e agora cada vez máis no mundo enteiro. Segundo din na páxina web da iniciativa, o plogging estendeuse a máis de 100 países e cada día máis de 20.000 persoas recollen lixo mentres corren polo planeta. Non é unha pasada? Algo semellante está pasando en Lugo co noso movemento Coidemos Lugo. Todo naceu nun paseo guiado no que de súpeto atopamos unha situación terrible no barrio do Carme: unha zona preciosa que adoitamos visitar apareceu da noite á mañá chea de lixo e cos seus centenarios muros derrubados. A rabia do grupo canalizouse a través das redes sociais e pouco tempo despois naceu un colectivo seguido xa por varios milleiros de persoas, no que participaron xa centos de voluntarios, e que non paramos de vivir experiencias formidables. Máis alá do reivindicativo e educativo de colectar o que outros tiran, experimentei, e experimento desde ese agosto do 2020, unha sensación de pracer que constato é compartida coas miñas compañeiras Grazas a Coidemos Lugo moitísimas persoas antes descoñecidas estamos unidas por unha causa fermosa, estreitamos lazos de amizade, viaxamos xuntas, e percorremos de punta a punta a nosa cidade e a provincia. O Carme, A Pousadela, Sagrado Corazón, Abella, A Piringalla, Paradai, Montirón, Acea de Olga, Albeiros, A Ponte... son ducias os barrios que limpamos (un por mes) e que agora xa estendemos a outras localidades galegas. A Coruña foi a nosa primeira saída da cidade, o pasado mes de febreiro, visitando o colexio Maristas. Este centro educativo interesouse polo noso movemento e alá fomos a mestra xubilada Teresa Pérez, a artista plástica e activista Ana Cabanes, e eu. Uns meses despois foi o turno da nosa primeira acción fóra do concello lucense, nas chairegas terras de Vilalba. A asociación de veciños de San Cosme de Nete, da que forman parte dúas das persoas máis activas e comprometidas de Coidemos Lugo, convidounos a visitar a súa zona e ao tempo visibilizar os problemas que existen sobre todo nas cunetas das estradas: por que a xente é tan descoidada? Alá fomos e o encontro foi sinxelamente fantástico: non só nos recibiron cunha grandísima enerxía, senón que ata convocaron gaiteiros e percursionistas e incluso nos convidaron a unha fantástica merenda. Recibimos xa convites en Chantada, en Viveiro, en Ferrol... todo se andará, pero de momento o que podemos constatar absolutamente é o contaxioso que é este sentimento de coidado polo ben común e sobre todo da nosa contorna natural e patrimonio. Son tendencias que creo debemos tratar de multiplicar, xa que de xermes así nacen os verdadeiros cambios no mundo. Agora que un vive todo isto vai descubrindo cousas como o do plogging, o excelente traballo de tantos colectivos ambientais galegos e do mundo e vaise dando conta un de todo o que podemos conseguir se tecemos rede. Este verán teremos, a oportunidade de seguir descubrindo lugares e movementos ao longo da nosa xeografía. É unha moi boa alternativa de ocio para nenas e nenos, para familias, para estudantes, para xubiladas e xubilados... para todos. Mentres coidamos do planeta e propagamos un sentimento de amor cara a el, faremos un labor social e ambiental fantástico. Súmaste?