A Galiza é o territorio no Estado con máis superficie agraria abandonada

A Galiza é a comunidade do Estado con máis superficie agraria abandonada. Segundo os datos que vén de facer públicos un informe elaborado polo Ministerio para a Transición Ecolóxica (Miteco), 35,4% da superficie agraria útil (SAU) total do país atópase sen traballar. Neste sentido, o informe gobernamental, que toma como base as cifras achegadas polo Ministerio de Agricultura, Pesca e Alimentación para 2020, apunta que, canda Galiza, presentan os perores rexistros Murcia, con 27,8% da SAU abandonada; País Valencià, con 23,3%; Illes Balears, con 23,1%; e Asturias, con 20,9%. O relatorio do Miteco sinala que 296.095 hectáreas das terras agrarias galegas están sen aproveitar. Neste caso, destaca que as maiores porcentaxes de abandono coinciden con aqueles terreos con cultivos permanentes, sumando 38.856 hectáreas, que representan 73,6% do total. Asemade, explica que “nas áreas de cultivos permanentes o abandono é moito maior en termos relativos naqueles concellos con risco de despoboamento”. Porén, advirte que está realidade é común a todos os niveis da SAU. Eva González, Coordinadora do GDR Limia-Arnoia: "Temos terra agraria de calidade abandonada" Os estudos máis recentes, elaborados por investigadores das universidades de Santiago de Compostela e Vigo, elevan a superficie agraria abandonada galega a 512.308 hectáreas. Así, a investigación Putting land to work: An evaluation of the economic effects of recultivating abandoned farmland, publicada en febreiro, revela que a SAU estimada sitúase arredor de 672.291 hectáreas, polo que as terras agrarias sen traballar na Galiza representarían, aproximadamente, 43,2% do total. A este respecto, a profesora da Universidade de Santiago de Compostela e especialista en economía agraria Mar Pérez Fra, sinala a Nós Diario que “alén dos datos concretos, do que hai pouca dúbida é que a Galiza atópase á cabeza do Estado en abandono de terras agrarias”. As conclusións deste relatorio avanzan que a posta en valor das terras agrarias non traballadas implicaría unha alza de ingresos para o complexo agrícola de 413,3 millóns de euros anuais e a creación de arredor de 10.000 postos de traballo polos efectos multiplicadores. Ao tempo, as perspectivas de futuro resultan preocupantes, sinalando o Centro Común de Investigación da Unión Europea (UE), servizo interno científico da Comisión Europea, que a Galiza perderá até 2030 35,5% da SAU actual. Escasa base territorial O abandono das terras contrasta coa escasa base territorial das explotacións galegas. Mentres as granxas no conxunto europeo dispoñen dunha extensión de aproximadamente 40 hectáreas, a superficie das galegas é moi inferior, o que provoca unha desvantaxe comparativa como consecuencia da alza dos custos de produción. Precisamente, a maior dependencia de pensos ou do mercado de forraxes provoca que as explotacións deban destinar 55% dos seus ingresos a facer fronte aos gastos de alimentación dos animais, situación inédita no contexto comunitario. Mar Pérez Fra critica que “estamos renunciando a utilizar con carácter produtivo o noso territorio”. Nesta liña, apunta que “non estamos falando de dotarnos dunha superficie agraria útil como Irlanda, que representa arredor de 80% do seu territorio, pero entre iso e unha SAU como a que temos, que significa entre 20% e 25% do territorio, hai unha marxe importante”. Galiza ten medio millón de hectáreas de superficie agraria infrautilizadas Ao tempo, advirte que “a diferenza de base territorial entre as explotacións galegas e as doutros territorios da UE é moi importante e iso obriga a importar insumos e alimentos e incrementa os custos de produción das explotacións”. Pérez Fra denuncia “o bloqueo do mercado de terras” como unha das causas deste problema. A este respecto, alerta de que “non temos un mercado de terras. Cando as explotacións fechan e esas terras se liberan non pasan a integrarse noutras explotacións que continúan activas”. Nesta dirección, lamenta “a ausencia de medidas que favorezan a mobilidade de terras".Iso provoca, di "o seu abandono ou o seu paso a usos forestais"!. "Fracaso" da política agraria O coordinador da Federación Rural Galega (Fruga), Manuel Dacal, explica a Nós Diario que os datos expostos "veñen confirmar o fracaso da política agraria da Xunta da Galiza" e considéraos “consecuencia dun proceso programado para favorecer o abandono de terras, coherente co programa neoliberal do Partido Popular, que aposta pola agricultura intensiva”. As mulleres cobran a metade de axudas da Política Agrícola Común que os homes Pola súa parte, a secretaria xeral do Sindicato Labrego Galego (SLG), Isabel Vilalba, entende que “a aposta da Xunta da Galiza está en proxectos desvinculados da terra”. Lamenta que “o proxecto de Lei de terras non teña un compromiso claro coa reversión desta situación e que a norma non dedique unha parte do país á produción de alimentos”.