Galiza ten xa 37 concellos en máxima alerta pola pandemia, entre eles as 7 principais cidades
Na última xornada incorporáronse a este indicador de nivel vermello a cidade da Coruña e as localidades de Cambre, Muros, Silleda, Soutomaior e Ribadavia.
O número de concellos galegos no nivel máximo de alerta, o 3, pola incidencia do coronavirus na última semana elevouse hoxe até os 37, 6 máis que na xornada anterior, e inclúe xa ás sete grandes cidades.
Así, na última xornada incorporáronse a este indicador de nivel vermello a cidade da Coruña e as localidades de Cambre, Muros, Silleda, Soutomaior e Ribadavia.
Ademais, segundo consta no mapa 'semáforo' actualizado diariamente pola Consellería de Sanidade, repiten en nivel 3 pola pandemia os concellos de Ferrol, Santiago, Pontevedra, Vigo, Ourense, Lugo, Carballo, Vimianzo, O Porriño, O Barco, Lalín, O Carballiño, Verín, Narón, Oleiros, Arteixo, A Laracha, Ames, Teo, A Estrada, Vilagarcía, Poio, Cangas, Salvaterra do Miño, Tui, Monforte, Fene, Marín, Redondela, Barbadás e Xinzo.
A entrada no nivel máximo de risco de todas estas localidades implica que detectaron máis de 21 casos de coronavirus no últimos sete días.
Con todo, nas urbes de máis de 50.000 habitantes, o limiar para detectar o aviso vai en función do tamaño: Ferrol -máis de 76 casos nunha semana-, Pontevedra -máis de 96-, Santiago -máis de 112-, Lugo -máis de 112-, Ourense -máis de 120-, A Coruña -máis de 276- e Vigo -máis de 332-.
Mentres, no nivel 2 -a cor laranxa do mapa- sitúanse 21 municipios, dous menos que o domingo. Do total, 17 repiten nesta lista: Mesía, Ordes, Neda, Malpica, Culleredo, Gondomar, Oroso, Cuntis, Bóveda, Ponteareas, Nigrán, Brión, Salceda de Caselas, Pontedeume, Noia, Boqueixón e Monterrei.
Na alerta laranxa entraron hoxe Cerceda, Cambados, Viana do Bolo e Viveiro, nos que se eleva o nivel de risco. Pola súa banda, A Coruña, Cambre, Muros e Soutomaior, que na xornada anterior estaban en nivel dous, este luns están no vermello. Mos e Boborás, pola súa banda, rebaixan o risco ata a alerta amarela.
En cor laranxa inclúense municipios de máis de 50.000 habitantes con entre 138 e 332 casos novos de Covid-19 á semana por 100.000 habitantes e nos de menor poboación que presenten entre 14 e 20 casos.