A Galiza sitúase á cabeza do conxunto do Estado en gasto farmacéutico

A Estatística de Gasto Sanitario do Ministerio de Sanidade sitúa a Galiza á cabeza do Estado en gasto farmacéutico. O documento, presentado a semana pasada polo Goberno español, estuda os recursos destinados polas administracións públicas ás diferentes esferas que conforman o sistema de saúde. O relatorio é o informe de referencia para coñecer as magnitudes financeiras do sector sanitario e elabórase cunha metodoloxía semellante para todos os Estados da Unión Europea, tomando como referencia a última liquidación orzamentaria fechada, neste caso a referida ao exercicio de 2021. Os datos da Estatística do Gasto Sanitario certifican o sobrefinanciamento do gasto farmacéutico. Nesta dirección, o Ministerio de Sanidade inclúe no gasto farmacéutico o xerado polas receitas médicas expedidas, o reintegro de gastos farmacéuticos e o gasto noutros produtos de subministración directa aos fogares. Non inclúe o gasto en produtos farmacéuticos que poidan dispensarse nos hospitais como programas selectivos de revisión de medicamentos ou medicación de urxencia. Tampouco incorpora as partidas dedicadas aos diversos niveis asistenciais, se ben o Goberno galego recolle no orzamento dedicado á Atención Primaria unha parte do gasto farmacéutico. Cada PAC terá que ter unha farmacia de garda a menos de 15 km de distancia Galiza destinou en 2021 a gasto farmacéutico 17,4% do diñeiro total dedicado a Sanidade nas contas públicas do Goberno galego. A porcentaxe representou un investimento 2,2 puntos superior á media estatal, situada en 15,2% e ficou moi por riba daqueles territorios cun sistema sanitario público máis eficiente, como Euskadi e Nafarroa, que dedican, respectivamente, 11,7% e 11,8% do investimento sanitario total a esta cuestión. A este respecto, a Xunta da Galiza incorpora como investimento en Atención Primaria as aplicacións orzamentarias destinadas a pago de receitas sanitarias, cando deberían computar como gasto farmacéutico. Os fondos destinados polo Goberno galego a gasto farmacéutico superan os destinados a Atención Primaria. Neste sentido, segundo os datos da liquidación dos orzamentos de 2021, nese exercicio, a Xunta da Galiza dedicou en 2021 a Atención Primaria 11,8% do total do orzamento sanitario e a gasto farmacéutico 17,4%. A situación repetiuse nas contas de 2022, nas que, segundo as cifras de liquidación dos orzamentos, o Goberno galego dedicou a Farmacia 1.252,1 millóns, deixando o investimento en Atención Primaria en 623 millóns, ao excluír a partida referida ao pagamento de medicamentos pola vía das receitas. A industria farmacéutica O voceiro de SOS Sanidade Pública, Manuel Martín, resume a Nós Diario as causas do maior gasto farmacéutico da Galiza en “máis presión da industria farmacéutica sobre a administración e sobre os profesionais á hora de fixar as pautas de prescrición de medicamentos, máis corrupción e máis irracionalidade na xestión do sistema sanitario”. Nesta liña, critica “o nivel moi baixo de fármacos xenéricos recomendados, cando está comprobado que os seus efectos sobre a doenza son semellantes” e culpa disto “a conivencia da administración e dos profesionais cos laboratorios farmacéuticos”. A enfermaría plántase fronte a inxerencia das farmacias na Atención Primaria Martín apunta á Consellaría de Sanidade e ao Ministerio de Sanidade, que “decide que medicamentos se usan no Estado e cales son financiados pola Seguridade Social”. A este respecto, sinala que “a Axencia Europea do Medicamento analiza o medicamento e determina se poden usarse, recaendo a súa autorización no Ministerio de Sanidade, quen fixa se o financiamento do mesmo vai ser público”. Nesta dirección, advirte da “presión da industria farmacéutica sobre os propios facultativos, pois as áreas sanitarias teñen competencia para prescribir medicamentos, de feito, en función das áreas, recéitanse fármacos diferentes”. A voceira de Sanidade do Bloque Nacionalista Galego, Montse Prado, denuncia, en declaracións a Nós Diario, “a opacidade e falta de claridade con que contrata o servizo Galego de Saúde (Sergas), até o punto de que máis de 80% destas contratacións fanse mediante mecanismos excepcionais, sen publicidade e concurso público”. Neste sentido, considera “escandaloso que 1.252 millóns de gasto farmacéutico de 2022 se adxudicase por esa vía, en base a contratos menores e prescindindo dos beneficios da contracción conxunta, en base as economías de escala”. Auxe, problemas e trampas dos seguros sanitarios privados O voceiro sanitario dos socialistas, Julio Torrado, pon de manifesto, en declaracións a Nós Diario, que “as razóns do elevado gasto farmacéutico na Galiza responden a diversas razóns, algúns delas de natureza moi complexa”. Neste sentido, considera que o gasto “pode xestionarse mellor por parte do Sergas, xa que os contratos menores representan unha porcentaxe moi elevada da contratación total". A industria farmacéutica marca a pauta do gasto A capacidade de presión da industria farmacéutica está detrás do incremento do gasto sanitario. A este respecto, a ONG Intermon Oxfam, nun relatorio elaborado en 2019, denuncia que o seu poder e capacidade de presión permítelle “forzar as lexislacións nacionais e internacionais para favorecer os seus intereses, aínda que sexa por conta da saúde e a vida de millóns de persoas”. As decisións do Goberno galego nesta materia non se explican sen ter en conta o papel da industria farmacéutica na sanidade galega. Un exemplo disto obsérvase na prescrición de determinados de medicamentos e nas políticas de contratacións de seguidas polo Sergas. O Consello Galego de Médicos pide a retirada do sistema de citas do Sergas O modelo Montse Prado ve "ineficaz" o modelo de contratación de medicamentos descentralizada aplicada polo Sergas, que "permite ás áreas sanitarias prescribir fármacos distintos cando a totalidade dos hospitais galegos son xeneralistas, polo que as especialidades son comúns". "Vendéusenos como solución unha central de compras conxunta para todo o Sergas, co obxectivo de reducir o gasto farmacéutico, porén, actualmente, esa central está privatizada e deléganselles funcións destas ás áreas sanitarias", asegura a deputada.