Doenzas do aparello circulatorio, as máis comúns nos hospitais galegos
A Galiza fechou o ano 2021 como o sexto territorio do Estado español coa maior taxa de morbilidade hospitalaria, con 9.992 altas por cada 100.000 habitantes, segundo publica esta segunda feira o INE na súa Enquisa de Morbilidade Hospitalaria, actualizada cos datos do segundo ano de pandemia.
De media, os doentes galegos e galegas permaneceron uns 8,36 días no hospital, dato semellante aos 8,32 días da media estatal. Por tipoloxía de doenzas, no conxunto da Galiza rexistráronse 1.447 altas por cada 100.000 habitantes relacionadas co aparello circulatorio, mentres que outras 1.312 foron hospitalizadas por cuestións do aparello dixestivo e 1.072 por tumores. Isto supón +11,3%, +10,3% e +10,5%, respectivamente, en comparanza con 2020.
Datos estatais
A nivel estatal, as enfermidades do aparello circulatorio (12,9%), as do aparello dixestivo (12,3%) e os tumores (9,7%) foron tamén, igual que no caso galego, as principais causas de hospitalización ao longo do ano 2021, sempre segundo a enquisa do INE. Aliás, se se analiza o número de altas dos principais diagnósticos a respecto do ano 2020, as enfermidades do aparto circulatorio aumentaron 11,2%, as do aparello dixestivo, 11,9%, e os tumores, 7,1%.
Por grupos de diagnósticos, as maiores taxas de morbilidade dos homes corresponderon ás enfermidades do aparello circulatorio (1.416 por 100.000 homes) e ás do aparello dixestivo (1.315); mentres que nas mulleres déronse nos episodios do embarazo, parto e puerperio (1.552 por 100.000 mulleres) e nas enfermidades do aparello circulatorio (1.053).
En relación aos falecementos, no ano 2021 faleceron 222.653 persoas nos hospitais de todo o Estado, 0,8% menos que en 2020, sendo os diagnósticos principais as enfermidades infecciosas e parasitarias, que inclúen a infección por Covid-19, (20,9% do total), as do aparello circulatorio (18,8%) e os tumores (17,1%).
As estadías totais —é dicir, o número total de días que permaneceron ingresados os pacientes que foron dados de alta en 2021— ascenderon a 37,6 millóns, o que representa 1,2% máis que en 2020, e 69,2% do total corresponderon á rede pública.
Os grupos de diagnósticos que causaron máis estadías hospitalarias foron os trastornos mentais e do comportamento (16,1%), as enfermidades do aparello circulatorio (13,2%) e as enfermidades infecciosas e parasitarias (10,4%).