Galiza entra na “nova normalidade” con 348 casos activos de coronavirus
Once menos ca onte. As UCI continúan sen persoas ingresadas por este virus.
A Dirección Xeral de Saúde Pública da Consellería de Sanidade informa que, na última actualización, esta segunda feira, o número de casos activos de coronavirus na Galiza é de 348.
Así pois, na primeira xornada de “nova normalidade” o número de persoas contaxiadas continúa a descender. Do total de casos, 108 son da área da Coruña, 20 da de Lugo, 26 da de Ourense, 8 da de Pontevedra, 140 da área de Vigo, 34 da de Santiago, e 12 da de Ferrol.
Do total de pacientes positivos, 8 están en unidades de hospitalización e 340 no domicilio.
Non hai pacientes positivos en UCI. Polo de agora, na Galiza hai un total de 10.489 persoas curadas, rexistrándose 619 falecementos.
O número de PCR realizadas é de 159.102.
Nas residencias de anciás hai 14 contaxiadas, a metade delas persoas usuarias e a outra metade, traballadoras neses centros.
No que respecta a número de falecementos, mantense en 274, das que 132 foron nas propias residencias e 142 en hospitais e residencias integradas.