A Galiza acumula 200 hectáreas de monte queimado no que vai de semana

Un incendio xa baixo control dos servizos de extinción queimou polo momento 20 hectáreas no municipio de Oímbra (Verín) tras iniciarse minutos antes da pasada medianoite.

Diso informou á primeira hora desta cuarta feira a Consellaría do Medio Rural, que tamén trasladou que o lume que desde a segunda feira arrasou 170 hectáreas no municipio de Crecente (A Paradanta) continúa controlado.

O incendio de Oímbra declarouse na parroquia da Granxa ás 23.20 horas da terza feira e foi dado por controlado antes das 4 horas. Na zona seguen traballando tres axentes, seis brigadas e cinco motobombas.

Ademais, a Consellaría do Medio Rural informou á primeira hora desta cuarta feira que o fogo de Crecente segue controlado. Á espera de novas medicións, a superficie afectada polas chamas mantense en 170 hectáreas.

O incendio iniciouse a segunda feira minutos antes das 20 horas en tres focos simultáneos, o que apunta á súa intencionalidade, algo que corroborou o alcaldes desta localidade en declaracións aos medios de comunicación.

Os fogos seguen activos

A pesar de que os dous incendios están controlados, segunda a Consellaría do Medio Rural, aínda seguen activos e podería aumentar a superficie de monte afectada. Até o de agora, esta semana xa se acumulan na Galiza case 200 hectáreas queimadas por estes incendios.