A folga de médicos na Galiza acumula máis de 1.200 cirurxías e case 24.000 consultas anuladas
Sanidade cifra en 11,69% o seguimento do paro este martes, dato máis baixo para a quenda de mañá desde o comezo da folga.
A folga de facultativos convocada na Galiza pola Confederación Estatal de Sindicatos Médicos (CESM) en solitario cumpriu esta terza feira unha semana desde o seu inicio o 11 de abril.
Ao longo dos sete primeiros días nos que se mantivo en vigor o paro, anuláronse un total de 1.223 intervencións cirúrxicas, 1.974 probas e 23.723 consultas externas, de acordo cos datos ofrecidos por Sanidade e actualizados na tarde da pasada segunda feira.
Ademais, sempre segundo cifras da Administración, o dato de participación situouse na mañá desta segunda feira para conxunto do país en 11,69%, o máis baixo nesta quenda desde o arranque da folga.
Por áreas sanitarias, como é habitual, a de Vigo é a que máis secunda este paro, co 18,12% dos médicos e das médicas secundándoo, seguida da de Ourense-Verín-O Barco de Valdeorras, co 13,94%, e da de Lugo-A Mariña-Monforte, co 13,21%.
En canto ao resto, a participación situouse no 10,09% na de Santiago-Barbanza, no 8,77% na de Pontevedra-O Salnés, no 7,58% na Coruña-Cee e no 6,94% na de Ferrol.
Xuntanza entre CESM e Sanidade
Así mesmo, o Sergas destaca que responde "adecuadamente a todas as urxencias" e reitera a súa aposta polo diálogo para pactar "as mellores condicións laborais para todos os profesionais".
Precisamente, a CESM e a Administración reuniranse esta cuarta pola tarde no comité de folga para tratar de poñer fin ao conflito. Será o primeiro encontro desde o comezo deste paro e o sindicato xa apuntaba na segunda feira a posibilidade de desconvocalo temporalmente.