Un foco con 30 contaxiados nunha residencia de Vilalba
O número de usuarios de residencias da Galiza diagnosticados con Covid-19 ascendeu até 359 -22 máis que onte- despois de que se notificase o contaxio de 30 persoas na residencia Asilo de Vilalba nunha xornada na que tamén se comunicaron varias altas.
Ademais desta trintena de novos casos, o último parte da Consellería de Política Social informa de que se rexistrou un positivo na residencia N.S. das Virtudes de Pontedeume.
O departamento, así mesmo, retirou do cómputo tres casos por dar negativo: Trátase de tres usuarios do centro DomusVi Coruña de Oleiros. Ademais, na pasada xornada, as autoridades sanitarias notificaron o falecemento de seis usuarios de residencias.
Deste modo, aos 337 casos de coronavirus rexistrados na pasada xornada habería que restarlle tres altas e seis falecidos, pero tamén sumar 31 novos casos, o que sitúa o total de usuarios de residencias contaxiados en 359.
En canto aos traballadores destes centros, mantéñense en 226 os positivos, os mesmos que na xornada do mércores.