Financia a Xunta o Camiño de Javier Negre, da canle de extrema dereita EDA TV?
O xornalista Javier Negre, promotor da canle de YouTube afín á extrema dereita EDA TV, informou nas súas redes sociais o pasado 30 de setembro de que iniciaba o Camiño de Santiago desde A Guarda, nun chío no que citaba os perfís oficiais do Xacobeo e da Axencia de Turismo da Galiza.
Desde entón, Negre publicou en YouTube vídeos diarios nos que informaba dos seus avances e nos que se podían apreciar claramente os logotipos do Xacobeo e da Xunta.
Aliás, en todas as súas publicacións en redes mencionaba a conta do Camiño Xacobeo, indicios que apuntan a un patrocinio da súa andaina por parte da Administración galega.
Nós Diario tentou contactar ao longo da semana en máis dunha ocasión con Turismo da Galiza para preguntar por esta cuestión, mais a día de hoxe o xornal aínda non obtivo resposta ningunha.
No portal de contratación da Xunta, por outra parte, non se acha información referida a un posíbel contrato asinado coa produtora, EDA TV Consulting SL, se ben cómpre salientar que os denominados contratos menores non teñen a obriga de recollerse neste rexistro e, por outra parte, a súa publicación non é inmediata.
Polémica con Caballero e Lores
Ao longo do seu Camiño, que rematou esta sexta feira coa tradicional visita á praza do Obradoiro, Javier Negre protagonizou —e difundiu na súa canle— un enfrontamento verbal co alcalde de Vigo, Abel Caballero, a quen acusou de "vetar" as súas preguntas.
"Que Abel Caballero é un alcalde chavista non é só porque teña un Aló Presidente cada noite nunha televisión local. Tamén polos seus intolerábeis ataques á liberdade de prensa. En Vigo ten a maioría da prensa comprada e dálle medo enfrontarse ás nosas preguntas", afirmou, algo que o propio Caballero desmentiu nos seus vídeos, nun momento no que Negre o interpelou camiñando pola rúa: "Cando queiras, pídeme unha entrevista".
Ao seu paso por Pontevedra, o polémico xornalista dedicou tamén unhas palabras críticas ao rexedor, Miguel Anxo Fernández Lores, a quen acusou de ter "unha cidade preciosa repleta de sucidade" porque, dixo textualmente, "o comunismo só trae ruína".